Samsung SMART Camera WB30F 10倍變焦足料抵玩
大家點睇一部只售$1,500嘅數碼相機？普通料？當然啦，做到咁嘅價錢都只會係入門級機種，影像質素都好難苛求，不過呢部新推出嘅Samsung SMART Camera WB30F就勝在功能多，內置濾鏡、可經Wi-Fi無線傳相，就連遙距取景都有，而其16.5mm薄機身仲有支24mm廣角十倍變焦鏡頭，影樹上花朵大特寫都夠用，初階機種而言都算齊料。
對應SMART Camera 2.0
今年Samsung新款SMART Camera型號相機已升級成2.0版本，即係表示只要用一個Samsung SMART Camera App就可同時做到AutoShare拍攝同步傳相、MobileLink無線傳相以及Remote Viewfinder無線取景，比起之前要分開幾個Apps先做齊以上功能，當然方便得多。這部WB30F理所當然支援SMART Camera 2.0格式，唔止Samsung自家GALAXY智能手機、平板可以用得到SMART Camera App，就連其他Android流動裝置以至iPhone、iPad都一樣用到，唔局限單一平台。
一按分享至社交網站
玩法方面，以AutoShare同步功能最新鮮，只要事先將相機跟手機或平板以Wi-Fi接通，相機可以在大家拍攝的同時，自動將相片傳送到手機或平板儲存，慳番事後再傳相的時間；而且手機或平板放得愈近，傳送速度就愈快。跟手機連動之外，WB30F亦內置相片分享功能，只要所在地方已有無線網絡訊號，就可將相片分享到Facebook、SkyDrive甚至微博，方便程度媲美智能手機。另外以入門級機種嚟講，WB30F機身規格都已經幾唔錯，尤其係內置一支24mm廣角十倍變焦鏡頭，影大合照又得，影過對面海或者樹頂嘅花朵都得。不過鏡頭成像力只屬一般，去到最Wide時，最大光圈都只得F3.1，散景效果同屬一般。
特效濾鏡整色整水
好多人分享相片前都愛整色整水，如加入各種特效或者加入有趣圖框，WB30F本身都提供好多相片效果畀大家揀，好似場景模式就有動感、夜景、可組合幾張相片嘅分割相片功能以及女生愛用嘅美顏功能，另外亦有受歡迎嘅魚眼、柔焦、微縮、卡通以及神奇圖框等濾鏡特效，仲可以用上Photo Editor功能喺影完原相後再慢慢執靚張相，查實都幾多嘢玩！
SPEC
感光元件：1/2.3吋1,620萬像素CCD
鏡頭：10倍變焦（24~240mm）
顯示屏：3吋
記憶卡：microSD
體積：98×57.9×16.5mm
重量：131g
查詢：3698 4698
$1,490
WB30F機身只厚16.5mm，非常之薄。
配備一支24mm廣角的十倍光學變焦鏡頭。
WB30F對應SMART Camera 2.0功能，在手機裝上一個App就可以做到AutoShare、MobileLink以及Remote Viewfinder功能。
機身設計以及按鈕布局都相當簡潔，機背還附上一塊三吋屏幕。
雖然鏡頭成像力一般，但十倍變焦鏡頭。
Zoom到遠一遠都得。
只要接上無線網絡，即可用內置分享功能將相片分享至Facebook、微博等社交網站。
一按機背右下角的Direct Link按鈕即可進行網絡選項分享相片。
WB30F支援ISO 3,200高感光度，以入門機仔嚟講已算不俗。
內置多款特效濾鏡選擇，如影人像時可考慮加入神奇圖框效果。