百人連線互揪《Online RPG Avabel》

以往用手機玩所謂Online RPG Game，整體水準總係差咁啲；這隻《Online RPG Avabel》就唔同，真係好有打電腦Online Game嘅感覺，其MMORPG架構非常完整，3D畫面更是極之華麗！而最勁地方就係號稱可以同時100人線上對戰！

雙系統連線

這遊戲玩法同傳統RPG一樣，靠打不同魔物升級，以及要完成各式任務；而本作最耍家係支援iOS及Android兩大系統，讓玩家實現跨系統合作和對戰，打破界限。玩家在遊戲內可以選擇合作挑戰魔物或互相對戰，版圖與玩法又夠多，的確超越了以往手機遊戲的標準。雖然此Game暫時只能連上日本伺服器，介面又只得日文，不過對由細到大都打日本Game的玩家而言，都估到來龍去脈。

系統：iOS、Android

下載費用：免費

集各家之大成《Destroy Gunners ZZ》

這隻《Destroy Gunners ZZ》玩法就似足《Gundam vs Gundam》，亦似《高達無雙》咁要對付眾多士兵，又或者似《三國無雙Empire》咁要攻佔領地，感覺上係好似集各家之大成。本作勝在操作直接，畫面又華麗，遊戲裏仲有多樣武器及機甲系統，可設定個人特色的機械人，鑽研味濃。

系統：Android

下載費用：免費

拼圖好幫手《PhotoGrid相片組合HD》

現在不少人都喜歡將幾張相片用App合併成一張，再加Effect、相框，整到靚一靚先上載FB。咁多款Apps揀邊隻好？小記推介大家一試《PhotoGrid相片組合HD》，它有多達105個布局模板以及42款背景，選擇多多，組合相片之後，可直接傳到各大社交網站，包括Instagram、Twitter、Facebook、新浪微博、QQ微博及人人網等，夠方便。

系統：iOS、Android　

下載費用：免費

LP2式動作《TPS FrontierGunners Online》

玩家在遊戲內飾演僱傭兵，要不斷完成任務來升級，大家要擊退怪物取得物料用來升級武器，以之挑戰更難的任務。其實本作玩法十分似《Lost Planet 2》，連線協力的形式亦跟到足。玩到後尾某些關卡怪物甚強，玩家獨自一人實難以應付，好在支援最多四人協力過關，否則有排你受！惟這遊戲需要連上日本伺服器玩，而介面亦是全日文，對不諳日文的玩家可能有點困難；另外目前遊戲就算以Wi-Fi連線的方式亦不算穩定，看來要等原廠更新才有所改善。

系統：Android

下載費用：免費

手機跳跳跳《Vector》

Android世界有不少Parkour（跑酷）遊戲，大多都是玩避障礙物及跳過深溝，玩得多都悶。而《Vector》就比較寫實，玩家跳過不同障礙物時均有不同的動作，動作更有過百款之多！雖然遊戲主角是以剪影顯示，不過已能看出其動作有多細膩。

系統：iOS、Android　

下載費用：iOS $8、Android免費

「衞生」玩兩手《決戰魚蝦蟹》

落場賭錢如倒錢落海，因此有人會打「衞生」麻將，免得講錢傷感情。估不到家陣連魚蝦蟹都有「衞生」版本，所講的正是《決戰魚蝦蟹》，完全不涉金錢，純粹過手癮。玩法跟足「原著」，仲有各式設定，例如抽水、每局最多注數等，更可揀難度呢！

系統：Android　

下載費用：免費