《Gears of War：Judgment》血肉長城擋獸群

下星期二（3月19日）推出嘅《Gears of War：Judgment》，絕對係萬眾期待之作，廠方亦加緊造勢宣傳，早兩日遊戲首席關卡設計師Jim Brown就飛到香港跟傳媒同機迷見面，仲首度示範「Survival」多人模式玩法，幾個玩家要扮演人類部隊築起血肉長城，抵擋獸族圍攻。再加上今集有好多新改動，老手玩落都覺得有新鮮感！

隱藏模式呼應《GOW3》

《Gears of War：Judgment》絕大部分玩法都係建基於之前幾代《Gears of War》，好似埋身「格劍」行刑仍然有得玩；而故事背景就係源自「事變日」，獸人突襲30日後嘅激烈戰鬥。遊戲由兩位創作大師負責編寫劇本，配合埋今集新增嘅Smart Spawn System智能再生系統、Dynamic Defence Scenarios動態防禦機制，同埋需用特定方法或武器解決的Declassified Missions解密任務，為原本已經刺激耐玩嘅遊戲再添好玩新元素。今集仲追加Aftermatch模式，即係遊戲戰役模式完結後的隱藏戰役，呼應埋《Gears of War 3》之後嘅故事，忠心Fans點可以唔玩！

合作捱打十個Round

多人戰模式亦大幅加強，今次Jim就帶來新「Survival」多人模式玩法，玩家要扮演人類部隊攜手應付強到離譜嘅獸族攻擊，捱得到獸族十波攻擊就算完成任務。Jim話呢個模式好講求玩家之間的分工合作，所揀選嘅職業要夠平衡先得，萬一個個都想衝上前線做戰士而唔肯做輔助性質嘅醫療兵或者工程師，就一定好快玩完；佢仲話嚟香港前去過十幾個國家示範，見證各地狂熱Fans試玩「Survival」模式，目前只得新西蘭有玩家隊伍捱得完獸族十波攻擊咋！唔知大家想唔想挑戰一下呢？

爆炸蟲自爆夠屈機

捱打好冇癮？Jim就話其實自己鍾意玩「OverRun」多啲，因為玩家同玩家之間要不斷扮演人類部隊及獸族部隊，捱打完之後下一關就可盡情蹂躪對手！基本上獸族已經佔盡優勢，而且控制獸族嘅玩家仲可以儲分解鎖新獸族上戰場，好似細細隻但行動超快嘅爆炸蟲就好屈機，可以高速走到人類部隊當中或發動機旁自爆，近乎避無可避。另一屈機獸族係超巨型嘅百足蟲，移動速度唔快，但軀體實在太長，兼會噴毒液，攻擊力強，要射好多槍先死，基本上無三、四個人類圍住一齊射都好難搞得掂。「OverRun」玩法係鬥邊隊玩家控制獸族時可搞掂較多對手，另外遊戲都設有比較傳統的「Domination」、「Free For All」同「Team Deathmatch」模式，不過畀我揀都玩「OverRun」同「Survival」先囉！

香港限量版 多着數

對於《GOW》Fans而言，當然要買套香港限量版支持吓。除遊戲外，仲送埋12個Xbox LIVE金會員訂閱卡、4GB USB卡、Kilo小隊紀念明信片同埋特別騎兵突擊步槍塗裝、經典雷爆突擊步槍同四個多人遊戲角色下載碼，認真大手筆。如果今個星期日（3月17日）到旺角信和「電氣良品」同「電子熱線」預訂香港限量版以及指定配件，仲送多本絕版《Gears of War》畫冊添，名額只得100個！

INFO

類型：射擊

開發：Epic Games、 People Can Fly

平台：Xbox 360

推出日期：3月19日

售價：$329（標準版）、$569（香港限量版）

查詢：3071 4868