HT 1/6 Barney Ross 龍威Take 2
雲集80年代荷里活打仔嘅《轟天猛將》（《The Expendables》），兩集票房都收得唔錯，第二集史泰龍仲搏老命炒車、炸飛機，加埋拳拳到肉極盡粗獷，就算劇情公式老套，依然深得「龍友」喜愛，Hot Toys老闆Howard就係其中之一，繼上次炮製過1/6 Barney Ross後，最近再以續集造型推出新版本，武器、配件都更加重手，又有兩套衫替換，作為致敬之作絕不失禮！
亦文亦武兩個Look
電影裏面嘅史泰龍真係冇得輸，年過60都繼續有火，續集再度扮演僱傭兵團首腦Barney Ross，Keep住Special Force咁款殺敵外，仲扮後生着牛仔背心喺森林探險。HT就做齊以上兩套衫，前者保持高水準，軍靴經過舊化，皮帶扣刻有標誌性嘅骷髏頭Logo，防彈衣就變成過頭笠設計，唔再有縮膊問題。便服Look亦見心思，除咗牛仔背心有洗水效果，內裏衞衣領口跟足戲服有三層Layer，額外跟埋一對皮鞋，製作認真。
配件抵食夾大件
雖然續集同首集只係相隔咗兩年，但歲月催人老，就算龍哥咁堅都唔例外，頭雕師Kojun特別將皺紋劃深、眼袋加大，再加埋一臉浮腫，整體感覺果然Old Look，不過老態刻畫重手咗，而且眼仔碌碌，少咗一分殺氣，希望大貨可以有所改善啦！電影中龍哥殺敵如麻，隨盒就有大把武器，包括兩把M1911系列曲尺，仲有舊式左輪及M4突擊步槍各一把，加埋九隻造型手掌，連埋黑超、防風鏡、耳機、手錶及雪茄，交足貨啦！
查詢︰2388 4677（Toy Hunters）
＊圖中為試辦款式，與正式推出的版本或有若干分別。
零售價︰$1,280
預售價︰$1,230
推出日期︰今年第三季
沿用上次嘅紋身Body，內置30個關節，仲有特種部隊及便服兩套衫任換。
腰背掛咗左輪槍套，方便擺拔槍甫士。
防彈衣改為過頭笠，更貼身，留意皮帶扣仲有精細嘅骷髏頭Logo。
手腕皮帶改用拆件，比上次一件過易除咗。
衞衣領口有三層Layer，直頭當真衫咁做。
造型手掌有九隻咁多，握拳、揸槍都有齊。
新頭雕由舊Version再作修改，髮型不變，不過加深咗皺紋及老態，可惜少咗殺氣，神似度爭啲。
附件包括防風鏡，不過戴咗之後感覺滑稽。
隨盒包埋四把槍、黑超、防風鏡、雪茄、手錶及耳機，單係配件都有排玩。