徐羨曾 漫畫情狂

創作人徐羨曾（阿徐）身兼多職，既是插畫師、劇團創作及演員、設計師，最近還忙於排練一齣分享集體回憶的舞台劇《勁金歌曲2—誰比你重要？》；其實阿徐也是一名漫畫迷，箇中收藏除有主流的幾米、麥嘜等作品外，亦對非主流或另類漫畫家情有獨鍾，他自言正正因為他們筆走偏鋒，所以更加觸動人心。

自認文字吸收能力一般的阿徐，漫畫是他的長期讀物，做漫畫家更是兒時志願。漫畫家筆下的世界，令阿徐有很大的代入感，兼且為視覺和思想上帶來無限衝擊，難怪他為了搜括心頭好，不時去書店、書展和舊書店，甚至不惜千里迢迢跑到發行商處去尋寶。

迷上利志達

跟很多70後的男生無異，學生時期的阿徐同樣愛看主流漫畫，但一次偶然機會，令他迷上另類創作，他回憶：「嗰時都冇錢買漫畫，最鍾意去一位住天台嘅同學屋企玩，佢爸爸同哥哥都係漫畫迷，屋企有大量漫畫，隨手拈來就可以睇個夠本，有次無意之間發現利志達嘅《黑俠》，馬上就被吸引住，仲開始收藏佢嘅作品。」

阿徐補充說：「我唔係抗拒主流，不過往往最觸動我嘅都唔係主流作品，我本身好鍾意戴面具嘅人物，覺得佢哋有神秘感，亦有人性，而往往戰鬥力都好強。利志達嘅《黑俠》就係一個悲劇英雄，佢嘅作品有好重電影感，每個場口都似足電影分鏡，打鬥唔係Sell招式，而係好有實在感。《黑俠》我都買咗多個版本，佢嘅《鋼鐵頭》、《刺秦》、《特務K》等，我都有收藏。」

心頭好講Timing

日本漫畫也是阿徐的那杯茶，雖然曾閱讀《男兒當入樽》、《北斗之拳》等熱血漫畫，但冷門漫畫家的作品才是他的珍藏，他表示：「以前喺書展發現星野之宣，畫功紮實，他鍾意借科幻題材講人嘅故事，內容既務實，亦富懷舊科幻色彩。至於渡瀨政造，畫功唔算好靚，但勝在巧妙運用色彩，每個故事篇幅短短，一般只得四頁，但係內容好生活化，淡淡然，令人睇得好舒服。」每種題材都有其獨特之處，能夠成為心頭好，阿徐表示要講「Timing」，他認為：「以渡瀨政造為例，佢嘅作品並不淺白，如果讀書年代認識佢，畢竟人生閱歷有限，相信反而對呢類生活化故事投入感不大。」但隨着人生的不同階段，他喜歡的漫畫種類亦有不同，但心願始終如一，希望有朝一日創作個人漫畫或繪本。