產地限定 流冰啤酒

日本樣樣嘢都話「地區限定」，通常「東京限定」、「北海道限定」咁普通都已經唔考慮，若果係某個市或者某個車站、空港限定就矜貴啲。不過呢支冰藍色啤酒小記諗都唔使諗就「無慮即決」！呢支係鄂霍次克限定的網走流冰啤酒，係喺網走市坐破冰船睇流冰時，在碼頭買的，佢聲稱用流冰融化製成，而冰藍色係來自螺旋藻，天然色素嚟，係鄂霍次克（即北海道同俄羅斯之間個海）冬季名物，第二度飲唔到！至於味道呢，就比較淡，似Sapporo生啤，但係就飲唔出冰藍色嘅味道。冬天嚟唔到唔緊要，佢哋仲出埋春天口味綠色知床啤，夏秋就有玫瑰紅色玫瑰啤同紫色薯仔啤，不過點計都無流冰啤酒咁夠噱頭！

Brian‧Reporter

平買鑽石

有人說，鑽石是女人恩物，但計我話，誰能替男人買鑽石，就是男人的恩人。早排有事要買鑽石，但小記卻對此一竅不通，重量、淨度、成色、切工幾個「C」，佢識我多過我識佢，而且只要些少不同，例如D級到F級，VS1到VS2，價錢已有很大分別；加上街舖「食水」極深，若盲舂舂購買，分分鐘被人到鋸到一頸血。幸好，最後得好友幫手，在樓上舖買入一粒各方面俱不錯，售價平半而又有出世紙的鑽石。話分兩頭，一粒石頭賣咁貴，對男人來說，始終極難理解。

Gilbert‧Reporter

水源充足

人可以唔食嘢，但就一定要有水飲。筆者試過喺和暖嘅冬天，拎支500毫升水去跑30公里，幾乎渴死咁滯！夏天就到，冇一公升水跟身都唔好諗住做運動。查實小弟都有好幾個插水樽嘅腰袋，不過都唔係好滿意，皆因唔夠貼身，跑步時支水「　　吓」，好唔自在，最離譜係以前有個「一剔牌」嘅出品，竟然連支水都飛埋出街，失敗！至於點解今次會買呢款「瑣羅門」呢？皆因小編嘅跑山達人同事S有個同款，佢話呢個腰袋好貼身，可以裝兩個原廠3D設計600毫升水樽，跑山都掂，冇理由跑街唔掂喎！

Tony‧Editor

占士邦冇去天凶城

我認，小記是個膚淺兼無做功課的觀眾，買這齣《新鐵金剛：智破天凶城》Blu-ray之前，一直以為天凶城是敵人的基地名，一個國際性犯罪組織，以天凶城為據點，策計劃驚天大陰謀之類的劇情，結果睇完成套片，都見不到半點天凶城的影子，感覺上就好像買了一套三級影碟，一睇之下發覺內容與封面不符。不過就可能因為與期待有落差，反而睇出新鮮感，占士邦不再是刀槍不入的英雄，而是有血有肉的特務；不再為世界和平而戰鬥，而是為了私怨而同你死過，作為007系列50周年作，都算是反高潮。

Angus‧Reporter

影星毒物

近年受朋友影響愛上影星，起初的入門裝備只能影銀河和星軌，影得多都悶。有次借用朋友的進階裝備，發現了深空攝星的樂趣，原來天空上有那麼多肉眼看不見而星雲星系，靚到無倫，於是決定添置裝備。而這件AstroTrac TT320X AG Tracking Mount就是其一，它為最輕便的導星儀，售五千幾元，確係貴，仲要每個半鐘手動設定一次，不過正就正在用到300mm長曝。所謂一闊三大，原來買了這個儀器，既要買流動電池又要改機，更要買個新波頭配合，今次真係被朋友毒到一鋪清袋啊！

Michael‧Reporter