《4 Pics 1 Word》看圖串字

實不相瞞，小記有時都會執筆忘字，要諗一輪先至記起點寫，唔記得英文字點串的情況就更常見啦！《4 Pics 1 Word》就是可幫大家溫習英文，顧名思義，每一關都會顯示四幅圖畫，大家要估四幅畫之間有乜係共通之處，然後就要串番個英文字出嚟，睇圖中呢幅四個人一齊跳就會好易估到係「Jump」，玩落去有啲都真係唔易o架！

平台：iOS、Android　費用：免費

《100 Doors 2013》諗計開門

《100 Doors》系列概念其實好顯淺，要諗計仔打開畫面上嗰隻門，開得到就過下一關繼續開門；不過由於每關都考大家唔同的解謎能力，難怪系列作長出長有。2013年版收錄咗119度門，仲會每個星期加入新門添！至於玩法就要用盡部手機的機能，包括要篤畫面、在畫面上畫線以及搖手機，唔好玩得太激動時掟爆部手機就得喇！

平台：iOS、Android　費用：免費

《UniqBoard: Sticky Notes》心思備忘

其實iPhone本身都預載咗個備忘錄，點解仲要畀錢買個記事App？《UniqBoard: Sticky Notes》最特別之處係可以自己用手寫或輸入文字方式寫低Memo紙，然後仲可以分門別類排列，想整個Shopping List又或者要交電話費、找卡數嘅清單都得。有心思的話，仲可以揀唔同顏色Memo紙，又或用相片做Memo紙，亦可加埋得意Icon，唔會好似內置備忘錄咁死板！

平台：iOS　費用：$15

《LINE Play》萌版The Sims

簡單啲講，《LINE Play》就係《LINE》出品嘅《The Sims》，或者可以講係萌版《The Sims》。玩家自己設定角色，在網上同其他玩家聯誼，組織一個新社交網絡。其實《LINE Play》去年12月已經喺日本推出，香港就只係剛推出冇耐。本作貫徹《LINE》遊戲的特點，角色同場景設計都以可愛取勝，開始時淨係揀做男性、女性或動物，再配搭唔同造型，但已經好傷腦筋。

入去玩遊戲之後，玩家就有一間小屋，要靠有限的鑽石添置家具同埋買靚衫扮靚，仲要開拓社交圈子認識新朋友。家具同靚衫都唔平，以開始得5,000鑽石嚟計，好快就用完，要靠做家務同去朋友屋企幫手做家務嚟賺錢，多勞多得。玩家所創造的虛擬角色會不時畀啲訊號做提示，當着起「刀叉」Icon時記住買食物，小記試過太耐唔畀佢食嘢，角色會病到白晒兼戴個「交叉」口罩。

賺錢買家品、換靚衫其實都已經夠忙，不過唔好忘記要同LINE Friend吹水。遊戲設有Lounge平台畀大家吹下水，除了打字之外，亦可以好似《LINE》一樣Send Icon公仔添，一玩沉迷。

平台：iOS、Android　費用：免費

《Funny Motion》搞笑舞王

真係幾佩服網上啲搞笑改圖，但其實自己用App都做得到，而且《Funny Motion》所改的更唔止係相，仲可以玩埋Video！呢個App玩法係將自己或朋友個樣Key落段跳舞片上面，預設就係芭蕾舞，但就可以揀場景，揀好晒選項就可以開心Share到Facebook或Youtube。想跳法式肯肯舞或者的士高舞步？畀$8就可以買一款舞步，唔知遲啲會唔會有埋Hit到要喺飛機上面跳嘅「哈林搖」（Harlem Shake）呢？

平台：iOS　　費用：免費

《Real Racing 3》寫實賽車

這個星期最有號召力的手機平台遊戲，首推EA開發的《Real Racing 3》。《Real Racing》系列向來都以超細緻畫面見稱，直逼家用機水準，今集更採用新Mint 3遊戲引擎，無論係車身的損毀，以至光源的動態反射及後視鏡效果都能細緻地表現。今集亦新增延時多人戰玩法，即使係GameCenter或者Facebook上的朋友唔在線，都可以透過呢個新系統以類似「Ghost Car」形式玩個「虛擬實時」多人戰添！

《Real Racing 3》都收錄咗唔少真實賽車同賽道，賽車方面就有保時捷、林寶堅尼、Audi及Bugatti在內的45架賽車，賽道方面亦有Mazda Raceway Laguna Seca、Circuit de Spa-Francorchamps及英國銀石等真實賽道。玩法方面亦有盃賽、淘汰賽、耐力挑戰賽及直道賽等900多項賽事。

本作架構相當龐大，下載檔案已經過700MB，裝完仲差唔多要2GB，點解仲可以免費推出？當然要靠In-App Purchase賺錢，好似遊戲就提供各種卡片及擴充包等玩家畀錢買，好似賽車擴充包就$78，競速規格收藏包更要$158，瘋狂車迷一下子可能會花咗幾百蚊！

平台：iOS、Android　費用：免費