罪過American Pie

農曆年期間，我遠赴美利堅探親，在紐約市過了一周的食瞓買生活，完全不事生產，不過也不及有天吃了個美國批罪過。那是Junior's Restaurant的出品，大件夾抵食的芝士蛋糕是其招牌菜，有日買了一個Strawberry Cheesecake Pie回家細嘗，餅皮內是實淨的New York Cheesecake，芝味豐腴且雲呢拿餘香悠長，顆顆士多啤梨有手指公般大粒，面層的果醬是一貫美式濃甜，家人中並非個個受得了。

Adrian Reporter

Creamy鹿兒島番薯

番薯被喻為健康食品，屋企廚房總有幾個。平日食，只會留意是黃芯還是紫芯，近日逛一田超市，就見到鹿兒島栗子黃金甜薯，外表看來皮較淡色和長身，聽聞是很矜貴的品種，更稱為「幻之甘芋」，500克要20多元，見講到咁巴閉當然要試下。入口超甜不在講，質感還很Creamy，職員教路最好用來煲番薯糖水，果真甜上加甜。

Ampo Reporter

懶理高卡下午茶

話說講減肥已講到身邊朋友都聽到厭，但作為飲食版記者，我一向抱住為民試食的心態，食咗先算。某日和朋友到半島酒店的The Lobby歎茶，柯打了一份我們最愛的Croque Monsieur。3層薄切炸麵包，中間是半融化的芝士和多層薄片火腿，配搭雖簡單，但熱辣辣脆卜卜入口，芝香味冇得彈。嫌油膩？不妨吃一口伴碟的酸瓜幼絲沙律，非常Refreshing。唉！睇嚟減肥大計都係得個講字。

Doris Reporter

快送脆豬

早幾日，去朋友曼克頓山嘅屋企攻打四方城，打打吓有人嗌肚餓，仲話好想食奶油脆豬，嘩！邊個去買呀？「嘿！嘿！嘿！」屋主嚇人笑聲突然爆出，都咪話唔驚，原來附近間翠華有得送外賣，美孚有翠華咩？「唔係，間外賣店喺深水埗！」話明係奶油脆豬，送到上來脆極有限吧！殊不知，摸上手仲熱。入口又脆，原來餐廳以電單車外送，又有專用外賣盒同特別保溫袋Keep住，體貼又夠快，抵讚！

Belinda Reporter

越菜喜相聚

難得姊妹淘，當然要揀間坐得舒服、唔會趕客走、食物質素又好的餐廳，在海港城的芽莊是個不錯選擇。選坐可欣賞海景的位置，點了招牌的藕苗沙律和酸子大蝦，兩者同樣酸酸甜甜，美味又爽口，完全是我們杯茶。邊食邊滔滔不絕分享，3個女生歡度了一個非常滿足的夜晚。

Silvia Reporter