鐵球重製版

筆者砌模型都有十幾年光景，多年來無論是「架生」抑或個人「功力」都增進了不少。故此，近日忽發奇想，展開「模型重製計劃」，目標是重新砌過多款早年推出的高達模型產品。而計劃頭炮就是《一年戰爭》的名機鐵球「RB-79 Ball」，幾日前路過旺角模型店，以$160元購入。今次筆者選擇重噴內構和炮身，又為駕駛員上色，經幾日「開夜車」之後，卒之完成拙作。跟自己六年前砌過的鐵球比較一番，發覺當時的水口、滲線及上貼紙技術都相當幼嫩，連自己都覺得核突呢！

Alfred Reporter

終於都買993

過去一年，有位同事不斷讚「新平衡」993係一對舒服到不得了的波鞋；奈何鑑於鞋款佬味太濃，因而不受致力扮後生的筆者所青睞。過完農曆年，本人態度卻有一百八十度轉變，皆因日日孭着阿囡四圍去，再加上長跑練習，雙腿攰到不得了，終於令我放下成見，趁有舖頭減價買番對。一穿上腳就知道同事冇老點，承托力足又軟硬適中，果然不是浪得虛名。話分兩頭，有人說新正頭不宜買鞋，惟在下並不相信這門子事兒；我反而想問，你們新年有洗頭嗎？

Tony Editor

老爸再發神威

農曆年期間，出街人多車多，有甚麼好得過買隻碟回家慢慢煲，小記就揀中這套《救參96小時2》，之前睇過第一集，沒甚麼期望下反而有點驚喜，節奏明快兼動作連場。今次第二集講這位由里安納遜飾演的退休中情局特工，再化身神奇老爸，為救妻女大戰恐怖分子，拳拳到肉的動作及槍林彈雨的場面固然精彩，但里安納遜用機智及經驗，化解種種危機更令人拍案叫絕。第二集雖不及第一集新鮮刺激，但亦有板有眼，隨時有機會長拍長有，同《職業特工隊》鬥長命。

Angus Reporter

「憤怒鳥」果汁

去旅行都鍾意逛逛當地的超級市場，皆因每每有新發現！好似早前貪機票平去菲律賓，竟然發現有「憤怒鳥」嘜頭的紙包果汁飲品，有100ml的小包裝，以及250ml的紙盒裝，每種都有可愛到震嘅「憤怒鳥」公仔，而且更會跟番公仔顏色而有唔同口味，例如紅色憤怒鳥就係蘋果汁，更認真地出齊八款口味。不過由於只能Hand Carry嘅關係，想買幾包返嚟做手信都唔得，惟有買咗即飲；味道就一般，勝在平，100ml小包裝只係賣$1港紙左右，一晚就飲晒喇！

Brian Reporter

PG家長指引

上次返大陸旅遊，竟然貪得意買砂炮玩，即係掟落地下會爆同發出聲響嗰隻，最盞鬼係只需五蚊人仔就有六盒。雖然個盒上面寫住「玩具砂炮」，但絕對唔啱小朋友玩，最好有家長陪同，因為佢掟落地下唔單止啪啪聲，唔小心炸到腳都幾痛，估唔到佢落足料。不過呢類含火藥嘅「玩具」唔畀帶過關，惟有即場一口氣掟晒佢，六盒加埋成百粒，但係小記玩完一盒已經覺得好無聊囉。

Jason Reporter