波牛召集 室內場過足癮

豈只奶粉，香港地，Book場踢波一樣難，事關喜歡踢波的人實在太多，但可供預約的政府球場實在太少，就算《FIFA》與《Winning Eleven》的畫面有多像真，始終不及親身落場盡興。近期香港掀起一片室內足球熱潮，打個電話就可預約，球迷毋須再花時間排隊、上網或寄信亦只換來一場空了！

正如電影《少林足球》山西豆腐隊的谷德昭所講：「我想踢波呀！」如此簡單的願望，在港偏偏困難重重，除了人多場地少，最慘預約方法繁複之餘又欠透明度，難怪炒場黨年年被人鬧，依然生意不絕。開張不久的室內足球場Master 5，屬於私人經營性質，平心而論，收費絕對不菲（非繁忙時段每小時$480、繁忙時段每小時$680），但勝在簡單公道，只要所選時段未有預約或作場地維修，打個電話、先到先得，毋須勞氣。

硬地變草地　更好Feel

現場所見，置身於工廠大廈內的Master 5，備有兩個五人小型球場，與見慣見熟的室內Futsal足球場不同，球場四周以圍板代替劃界，並以仿真草取代木板，場地負責人黃先生解釋：「其實香港好耐之前已經有圍板場，日本、台灣、英國都有，我哋就由室外搬入室內。由於工廈樓底矮，所以我哋喺天花加裝圍網；另外圍板場崇尚地波，龍門框一般唔過腰，不過我哋改用較高嘅龍門框，少啲限制，等大家踢得盡興啲。」老闆之一的港甲球員黃展鴻補充說：「其實圍板場同踢街場都幾相似，不過我哋有樓底限制，正好要玩家盡量踢多啲地波，練番好啲個人技術。至於地板改用仿真草，係想減少受傷機會，又有踢草場嘅感覺。」

圍板場戰術　三大攻略

採訪當晚，兩邊場都Full Booking，如果想比賽流程更順暢，筆者有以下三大攻略與球迷分享：

1.快上快落

正如《一代宗師》所教：寧可一思進、莫在一思停，由於場地細，而且不可藉出界抽空休息，故此全場節奏相當急速，體力消耗之大，往往出乎意料，玩家還要懂得腦筋急轉彎，事關攻守次序以至雙方球員位置，頃刻已變。

2.地波王道

樓底矮，加上足球觸及天花繩網就當出界，故此鹵莽踢高波只會整蠱自己，很易就被對方斷球反擊，踢地波才是最有效的戰術，較易爭取到主動權。

3.勇於撞板

在室外場踢波，「撞牆」成功與否在乎隊友的走位配合，不過圍板場的四面圍板，由開波到完場都可成為雙方的撞牆對象，在一對一過人推進時最合用。

必選TF Boot

裝備方面，衫、褲、襪都與街場無異，不過由於是仿真草場地，球鞋選擇最好由平底改為人造草專用款式（TF），後者的外底布滿小型膠粒鞋釘，有效增加抓地力。

玩家有Say

Nick：「第一次玩圍板足球，唔係好識計點先算係出界。身體接觸都幾多，唔識收嘅話都易受傷，不過真係練到細膩腳法，入波亦容易。」

Eman：「場地細，相對地攻守節奏都快好多，而且唔好獨食，要打整體戰，隊友之間要擅用圍板玩撞牆，否則好易冇氣乾塘。」

陳先生：「牆身唔係好彈，個波响草皮上亦都唔係好去，收費亦似乎偏貴，不過配套齊全、有冷氣，位置又就腳，好易約齊人。」

球例你要識

雖然同樣是五人場地，但環境不同，加上想加速球賽節奏，故此室內圍板場的規矩，與一般街場有不少分別，主要重點如下：

a. 足球觸及天花繩網的話當出界論，需作界外球處理。

b. 界外球以腳開出，不可用手拋擲，並需於五秒內開出，對方就要保持三呎距離。

c. 不設角球。

d. 設七碼罰球點，只可立定射，不可助跑。

e. 禁區內只容許己方龍門出現，對手以至己方其他球員都不得入內，龍門亦不可站出禁區外。若有非龍門的己方球員走入禁區，但沒有觸球的話，判對方可得界外球；如有觸球或龍門走出禁區，即判對方可得罰球。

f. 龍門只可用腳控回傳球，不可用手接，並需於五秒內傳球。

g. 己方龍門可直接向對方龍門施射，但途中足球至少要有一次觸地才算入球。

h. 嚴禁剷球。

i. 只可單手觸板，背後的對手施加壓迫時，雙手觸背時間只限兩秒，違例當界外球計。

產品查詢：（a）2388 8382（旺角花園街Nike Football）、（b）2730 0157（尖沙咀漢口道adidas旗艦店）

場地查詢：3996 9647（觀塘鴻圖道嘉鴻中心一樓Master 5）