雙龍接力上 ES Raiking & Balking

本地薑「ES合金」繼Gaiking之後,同系嘅Raiking & Balking亦已接棒上架,玩家終於可以湊齊三條龍,拆件合體變身做Gaiking The Great。Gimmick配件亦賣大包,繼初版ES Gaiking有合金電鍍龍身,今次Raiking & Balking套裝亦整多個着燈頭及鍍金巨角,合體後嘅Gaiking The Great雙眼發光又有合金身加持,貴氣又墜手!

Raiking香雞腳企得穩

原裝設計嘅Raiking上重下輕,一對香雞腳跟龐大身軀及兩邊紅色厚肩甲形成強烈對比,變做玩具實物,就要考慮重心問題,以免企唔穩。ES Raiking大膽用Die-cast製作龍身,再加PVC雙腳,竟然冇重心失衡,箇中玄機係減省咗雙腳關節,只係保留髖部及足踝,雖然可動性會有所影響,不過對Q版機械人Figure嚟講,也冇乜所謂,可以接受。至於合體變形方面,Raiking嘅主體連雙手會變成Gaiking The Great嘅中央部分,手腕就要先拆卸再上下對調,令手臂變得粗壯。

Balking合金足秤

至於重火力嘅Balking,雙手設計類似三一萬能俠三號機嘅節狀可動設計,可以隨意扭成合適幅度,由於膊頭及巨拳係膠件製成,所以唔會出現手臂唔夠力嘅情況出現。至於合金部分就相當足秤,除咗胸膛嘅Die-cast龍身,整個下盤以至雙腳都係合金物料,包保墜手、企得穩。合體做Gaiking The Great時,先要拉出Balking嘅雙腳延伸長度,膝蓋再裝埋鍍金十字鏢就搞掂,但要注意Balking嘅頭部Ball Joint比較緊,轉動時要特別小心,慎防意外扭爆。

(c)TV朝日.東映Animation

查詢:2390 9843(Action Toys Ⅱ)

Alfred

ES Gokin Series 10 Raiking & Balking 建議零售價:$668

Raiking只得一把大鐮刀,由於膝蓋不設關節,擺甫士有所局限。

Raiking嘅手肘設有內藏關節,可以90°屈曲。

Balking嘅手臂用咗節狀可動設計,可以隨意扭成不同角度。

Balking嘅主武器係一對巨斧,形象夠晒力量型。

Raiking(左)與Balking(右)都係由三組部件合體而成,前者有大型飛翼,後者就有一對大斧頭。

合體做Gaiking The Great前,Balking嘅雙腳要先拉出延伸長度,再喺膝蓋安裝鍍金十字鏢;至於Raiking嘅主體就要拆走前腕及手臂兩節,再上下對調組裝,變成合體後嘅手臂。

背翼可以從後拉出,內置齒輪轉動時會發出「卡卡」聲,唔怕扭得多變鬆。

初回特典除咗有識着燈嘅頭部,仲有鍍金巨角及膝蓋嘅十字鏢,實在賣大包。

由於Boxset已經跟埋識着燈嘅頭部配件,只需拆走Gaiking嘅電鍍龍身就可完成合體。