時裝達人Wallace Kwan毒愛Baseball Cap

身為I.T旗下Double-Park創意總監兼時裝精的Wallace Kwan，每日都對着大量最新最潮的時裝服飾，掌握到最新的潮流走勢，「日子有功」自然就乜都買得比人多、比人精。早年愛儲波鞋、恤衫的他，近季度轉追Hi-Street造型必備的Baseball Cap，不經不覺已收藏了近20頂不同潮牌的出品，以單一款式而言，已算得上「中毒」頗深了！

Wallace坦言早在10多前已有襯棒球帽習慣，他回憶道：「當時因為Hip-Hop文化而愛上棒球帽，不過之後一直冇再戴，直至近年潮流界興番Street Fashion，仲演變成Hi-End混Street嘅Hi-Street風格，令自己重新提起對呢類棒球帽嘅興趣。」

全黑最好襯

在Wallace的收藏之中，超過大半數都是Supreme × New Era款式，而且是潮人最Buy的「Supreme Box」，基本上講得出的款式他都有入手，絕對是忠實粉絲：「我一直鍾意Supreme，所以通常到外地工作，都會順道入手，多數係喺日本Supreme專門店買；本地因為無專門店，所以要買就只有幫襯水貨舖。」

Wallace的收藏大致可分為兩類，還會如時裝般「換季」，他解釋說：「你見我最多都係黑黑藍藍嘅款式，因為呢類款式最簡單易襯，毋須左諗右諗，稍為有點顏色嘅款式，就為咗襯唔同造型先入手，例如秋冬季我會多戴絨或燈芯絨款，用嚟襯一啲Wool、Tweed嘅時裝；春夏就會改戴一般羊毛款式嘅用嚟襯恤衫、短褲。另外，帽上唔同位置嘅繡花Logo，都係我入貨嘅考慮因素，其實眾多款式當中，戴得最多都係全黑色嗰頂，因為唔使諗、最方便。」正如Wallace所講，相信大部分人襯衫也是同一道理，家中有很多衫，但永遠着嚟着去都係嗰幾件，放諸棒球帽、波鞋亦同一道理。

身為時裝集團要員的Wallace，本應俗世間所有棒球帽款式都應可唾手可得，偏偏他也會遇上遍尋不獲的情況，他表示：「其實大部分New Era款式都可以輕易入手，相對地，另一個美國棒球帽品牌Ebbets Field嘅出品就較難搵，因為之前興過一啲40's至50's嘅American Classic造型，令我無意間留意到呢個品牌，所以先後買咗三頂，當中一頂與A Bathing Ape嘅聯名款式，都係我喺日本工作時先買到。」

雙倍價錢覓摯愛

Wallace強調最難入手其實係眾多收藏當中唯一一頂嘅Two Tone款式，他回憶道：「呢頂係法國潮牌Kitsune × New Era款式，當時出得好少貨，香港只有潮流網站Hypebeast售賣，我知道時已經買唔到，原本都諗住放棄，最後竟然畀我喺日本買取店以¥10,000買到，但『十算計』嘅話，差唔多比原價貴咗一倍。」