黃金聖鬥士 Q版超靚價

今日係大年初四，或者你仲享受緊最後一日嘅農曆年假期，其實好多店舖已啟市，就連玩具店都唔例外，喺深水埗甚出名嘅「精品」就趁新春期間搞咗個「優惠限定」活動，多款玩具以筍價開售，各位玩具迷要有心理準備，預咗啲利是錢左手嚟、右手去。

老實講，類似嘅開倉活動有時都係徒具虛名，不過今次「優惠限定」就吸引得多，孭飛嘅一眾KidsLogic Q版黃金聖鬥士，由角色人氣以至造工質素都充滿說服力。至於魅力永遠高企嘅超合金及變形金剛，加埋近年嚟Hit到冇人有嘅《One Piece》，都係今次嘅優惠內容，定力再高嘅玩具迷，看來都幾難忍手！

閃令令聖鬥士

本地薑KidsLogic製作嘅CBC黃金聖鬥士系列，唔只香港熱賣，反攻日本一樣紅得起，最新作品係巨蟹座迪斯馬斯克，表情、姿勢都夠晒得戚，不過小心頭盔多尖位，把玩時咪拮傷手指。同場仲有白羊座穆先生、獅子座艾奧尼及金牛座阿魯迪巴，穆先生仲要$220有找，抵到冇朋友。

海賊王全場九折

《One Piece Film Z》明日在港上畫，精品一於食住個勢，決定全場One Piece商品九折開售，心水推介係港產作品「Q Power」系列，選用之前劇場版《Strong World》嘅造型，位位角色都西裝骨骨型到痹，雖然主角路飛晨早賣斷市，不過烏索普、卓洛及山治等人氣角色仲有少量，希望你仲趕得切落舖入貨啦！