V-Day 甜蜜互送

今年情人節適逢年初五，唔少人分分鐘認為「V-Day大過年」！除咗要好好計劃明日節目同埋夜晚去邊度撐枱腳之外，相信買咩禮物送畀對方都好傷腦筋。計我話，送數碼科技Gadgets最穩陣，實用得來又靚仔，保證唔寒酸。你知啦，送禮嘅嘢，不單止要冧另一半，仲要威畀燭光晚餐隔籬枱嗰Pair睇o架！

For Her

女士們選Gadgets，最睇重嘅就係外形同設計，如果有埋簡單易用嘅新功能就更Good Fit，男士們識揀啦！

HTC J 和風美型

備有黑、白、紅三種配色，機身採用修長設計，其中紅色一款更用上拋光處理，女士實Like之餘，紅噹噹又夠應節！另外此機有800萬像素鏡頭及F2.0大光圈，燭光晚餐時拍照都唔驚鬆郁矇！

Olympus PEN E-PL5 反芒連拍

E-PL5備有1,605萬像素感光元件，更有水彩效果、單色效果等共12種藝術濾鏡，輕易就可以拍出Moody相片。最重要是配備可向上反170度及向下翻轉65度的3吋屏幕，加上新增的自動自拍模式，能夠連續自拍多張，簡直係為愛自拍嘅女士而設。

Casio Exilim TR-150 美肌自拍

女士多鍾意自拍，TR-150的3吋篤芒可作360度旋轉，配合獨特手柄設計及21mm廣角鏡頭，自拍對位話咁易。最正係內置12級美顏功能，擺上網嘅相肯定靚爆。

Acer Aspire S7 輕巧薄切

女士嬌滴滴，冇理由拎部幾斤重嘅電腦出街。13.3吋的Acer Aspire S7不但屏幕係用Corning Gorilla強化玻璃，亦支援篤芒，可用Win 8手勢指令。最吸引是機身只厚11.9mm及僅重1.3kg，拎出街都唔怕手仔攰！

Hello Kitty Power Cube 4000S可愛充電

內置4,000mAh容量的外置充電池，備有microUSB線及USB輸出，可以同時為兩件裝置充電。機身特別刻上女士最愛嘅Hello Kitty，加上採用鋁合金物料，賣相討好。

iPad Mini 輕量Tablet

機背用上全鋁合金製造，重量只有傳統iPad的一半，拎出街都輕鬆啲。佢有7.9吋屏幕配搭雙核A5處理器，又支援4G制式，用來玩Apps、睇片都冇難度。

For Him

男士揀科技產品就最重視功能同規格，最好就係又快又新，仲要功能多多，最緊要方便工作！

Asus PadFone 2手機變平板

此機係由4.7吋屏幕的手機以及10.1吋屏幕的PadFone Station機座組成，搭載1.5GHz四核心處理器、2GB RAM高規格，手機可獨立使用，而只要將手機滑入機座，就結合變成Tablet，方便又實用。

Samsung GALAXY SIII LTE極速上網

男士追求速度，智能手機亦不例外。GALAXY SIII LTE備有1.4GHz四核心處理器，加上2GB記憶體，狂玩多工處理都冇問題，而且全面支援香港4G制式，可極速上網。

Lenovo ThinkPad X1 Carbon碳纖硬淨

如果男友成日外勤工作，Notebook設計就一定要夠硬淨。14吋ThinkPad的內櫳除了加入招牌的防滾架保護機件外，機身更用上碳纖維物料，並通過MIL-STD軍用標準測試，少少撞擊都唔怕。如此堅實的機身都只重1.36kg及僅厚18.8mm，袋喺公事包都好輕便。

Plantronics BackBeat GO運動專用

男士多愛玩戶外活動，BackBeat GO藍芽耳機只重13g，並採用P2i SWEAT PROOF納米塗層科技，可阻隔汗水和雨水滲入，戶外用就最適合。依家仲有白色的Active Edition限量版，帶上耳舒服又型仔！

Pentax MX-1 復古味道

機頂及機底用黃銅物料打造，加上用仿皮包裹機身，極具古典味。此機備有F1.8大光圈鏡頭及1,200萬像素，亦可以拍出RAW格式相片，鍾意執相嘅拍友至啱用。

Canon EOS M 換鏡新作

Canon首部Mirrorless相機，採用APS-C尺寸1,800萬像素CMOS，加上有DIGIC 5影像處理器，畫質有保證。用家更可用EF-EOS M轉接環裝上同廠嘅EF、EF-S系列鏡頭，並對應自動對焦及IS防震功能，如男友係Canon單反的用家就Fit晒喇！

ideer相機帶 潮氣格紋

ideer係本地相機配件品牌，這款相機帶有粗幼兩款，DSLR、無反都用得着，而且更有格仔、波點做花紋，掛上頸都冇咁單調！

至冧愛情Apps

難得同愛人共度情人節，除咗送禮之外，當然仲要花吓心思。建議大家不妨下載定一啲應節冧App，一齊同身邊人玩吓，大晒恩愛！

《Angela's Valentine》卡通示愛

屬搞笑變聲App《Talking Tom Cat》嘅同系產品，今次搵埋Tom嘅愛人Angela一齊玩。佢預載一套阿Tom向Angela示愛嘅卡通，可以控制佢哋攬攬錫錫，跟手仲可以加埋肉麻心底話連卡通Send畀愛人，夠晒Sweet！

下載費用：免費

支援平台：iOS 4.3

《Valentine Videogram》搞鬼影片

只要事先將臉部對位，畫面上熊仔或心心眼卡通嘅表情就會跟到你足，你笑佢又笑，你瞇眼擘口佢都照跟，可愛到暈。

下載費用：免費

支援平台：iOS 5

《Valentine's Day!》後製甜蜜照

同愛人約會梗係要合照啦！嫌一般合照太單調的話，就一定要用《Valentine's Day!》呢類情人節整相App，佢有大相框、道具畀你加落幅相度，甜蜜合照輕易搞掂！

下載費用：免費

支援平台：iOS 4.3

《Love-O-Matic》計計戀愛指數

唔知自己同身邊愛人夾唔夾？只要用《Love-O-Matic》輸入雙方名字，就會計算出愛情指數。此App有時真係會計到超低愛情指數，不過只要更換英文名或者中文全名，結果會唔同晒，純粹得啖笑。

支援平台：iOS 4.0

下載費用：免費

查詢：（a）3520 1234、（b）2376 2150、（c）2926 2300、（d）2520 2000、（e）2959 6226、（f）800 908 988、（g）3582 4738、（h）3698 4698、（i）800 938 881、（j）2395 3913、（k）2926 2987、（m）3191 2333、（n）2917 7223