相嗌唔好口 打機最啱數

初三赤口唔拜年，咁有乜好做？往年就要收拾心情初四開工，但今年初五先啟市，仲可以大玩特玩。以下就介紹啱一個人自己煲以及可約埋幾個朋友仔一齊玩嘅遊戲，最正係唔少Game舖今日已經開門，想玩就落街買啦！

《Wonderbook：Books of Spell》變身哈利波特

平台：PS3 Move

此乃以PS Move操控掣變身成魔法棒的魔法書遊戲，仲對應AR技術，而且由《哈利波特》作者J.K.羅林執筆寫故事。隨遊戲會附送一本畫上符碼的AR書，經PS Eye鏡頭一照就會變成魔法書，可以跟住遊戲講魔法暗語，兼且用PS Move控制器使出魔法！

《Dance Central 3》跳爆新年

平台：Kinect

收錄甚多新歌，仲有唔少Add On可供選購，連紅爆全球的《Gangnam Style》都有得賣！今集有全新Crew Throwdown模式，可以畀兩隊舞者鬥一番玩跳舞Battle，每隊最多可由四人組隊，夾埋可以八人玩；不過技術所限，每次都只能一對一，但可自創舞步挑戰人！

《箱！Open Me》開箱兼運動

平台：PSV

要玩家開寶箱，逢版過版嘅玩法都幾有挑戰性。大家要打印一張開箱用的AR紙，再用PS Vita機背的鏡頭一照就可以玩，玩家要沿住擺了張AR紙的枱面繞圈轉，睇吓可以點樣打開個寶箱。遊戲設計雖然簡單，但要行吓踎吓搵開箱角度，對新正頭食得太多糕點嘅朋友而言都不失係健康活動！

《PlayStation All-Stars Battle Royale》跨平台亂鬥

平台：PS3、PSV

呢款大亂鬥式遊戲，除了可以用唔同PS遊戲角色大戰外，仲可以跨平台連線玩，供最多四位玩家互打。當然PS Vita本身都要有隻PSV版遊戲先得！遊戲由暴力的《GOW》Kratos，到可愛嘅多樂貓都有得打，連PSN人氣角色Fat Princess胖公主都有；識玩嘅儲氣出超必又得，唔識玩嘅亂撳掣又未必輸！

《New Super Mario Bros. U》GamePad搞亂檔

平台：Wii U

唔少玩家買Wii U時都會買埋這隻Game。今集最特別係支援五人一齊玩。四位玩家可用Wiimote或Classic手掣操控，至於第五名玩家就用GamePad玩，而佢則無法控制任何角色，只係負責篤畫面加入磚塊，不過到底係幫幾位朋友跳高，抑或阻住人過關，就好睇呢位仁兄嘅技術同心腸喇！

《LittleBigPlanet Karting》可愛大賽車

平台：PS3

「孖寶賽車」式玩法的賽車遊戲其實都有好多隻，分別在於唔同公司換上旗下遊戲角色而已。本作就係用《LBP》一班主角擔大旗，牽頭纜當然係Sackboy啦！玩法方面，有目標任務、頭目戰鬥同迷你遊戲，甚至乎可以設計賽道挑戰朋友，舊瓶新酒依然好玩！