儲定全年好運 明日一路向東北

明日係大年初三，怕「赤口」拜年會嗌交？如果你係車主一族，不如趁機帶埋屋企人齊齊遊車河、行大運，順道上香祈福；玄學家龍震天師傅教路，東北係大年初三嘅出門大利方向，夾啱吉時出發，一於新正頭就儲定全年好運氣！

根據龍師傅指出，明日係大年初三己酉日，最有利嘅方位係東北，概括嚟講，鑽石山、西貢及大埔都可列入東北區嘅範圍。雖然香港道路網根本就冇大直路一程去到，不過唔使愁，其實只要向住東北方而行，就算中途兜一兜路，都一樣應到行大運嘅意頭。

兩段式吉時選擇

咁講法，明日嘅行大運可以點樣部署呢？龍師傳教路：「明日嘅吉時由午時開始一直至未時，橫跨兩個時段，第一段吉時係早上11點到下午1點，第二段就係下午1點到3點，大家可從中選擇Fit到自己嘅時段。」如此一來，筆者建議可於吉時向西九龍往東北出發，先揸車去鑽石山南蓮園池食齋、再兜入西貢蠔涌車公廟參拜，再到大埔林村兜番轉，催運之餘兼夾郊遊一番。

起點：西九龍海濱長廊

位處西九龍新填海區南面嘅海濱地帶，揸車從柯士甸道西與雅翔道交界一條雙線雙程路，直駛向盡頭迴旋處就到，呢度既可飽覽港島及維多利亞港，又可遠眺昂船洲大橋，加埋徐徐海風，睇落又真係幾有靈氣，喺度出發夠晒意頭。

Check Point小資料

地點：尖沙咀柯士甸道西與雅翔道交界

開放時間：6:00am-11:00pm

查詢：2302 1279

小貼士：入口處旁邊設有露天停車場，時租$10。

第1站：鑽石山志蓮淨苑

離開西九，取道佐敦道、加士居道、公主道、聯合道及龍翔道，就可駛往坐落鑽石山嘅志蓮淨苑及南蓮園池。前者係一座仿唐風格佛寺，後者亦仿照唐代園林打造而成，內設齋館及茗茶室。苑池相互毗鄰，儼如鬧巿中嘅一片靜土；大家可以先到志蓮淨苑拜佛祈福，然後再到南蓮園池遊覽兼食齋，吸收靈氣兼醫肚。

Check Point小資料

志蓮淨院

地點：鑽石山志蓮道

開放時間：6:30am-7:30pm（蓮園）、9:00am-4:00pm（佛寺）

網址：www.chilin.org

南蓮園池

地點：鑽石山鳳德道

開放時間：7:00am-9:00pm

網址：www.nanliangarden.org

小貼士：寺院不設停車場，可將座駕泊喺對面嘅荷里活廣場停車場，新春期間至本月28日，只要出示鮮花或有花卉相片，即可享3小時免費泊車。

第2站：蠔涌車公古廟

之後沿住龍翔道轉入新清水灣道，經西貢公路往西貢蠔涌進發。當地有座逾400年嘅車公廟，比起沙田嗰座更加歷史悠久，故此又名車公古廟，每年春節期間，唔少善信都會嚟到上香祈福，香火同樣鼎盛。拜完車公，不妨打響廟內鑼鼓，據知可將心願傳到天庭，當然唔少得轉吓風車，一於轉走龍年霉氣、轉來好運氣。

Check Point小資料

地點：西貢蠔涌路

開放時間：8:00am-5:30pm

查詢：2719 0373

小貼士：廟旁空地可供泊車，不過通常新春期間，尤其是大年初三，都有大量善信揸車嚟到，人多車又多，或者會有交通管制，屆時敬請留意在場警方指示。

終點：林村許願樹

拜完車公，就可沿住西貢公路、大網仔路、西沙路，經馬鞍山繞道及吐露港公路兜入大埔。位於林錦公路放馬莆村嘅林村許願樹，素來係許願勝地，雖則許願樹已經換咗由玻璃鋼樹桿打造而成嘅人工細葉榕頂替，仍然無阻市民嚟拋寶牒嘅雅興，仲可以喺樹旁許願池，放埋寫咗願望嘅蓮花許願燈。穿過許願廊，就到清乾年間建成嘅天后廟，供奉咗天后、文昌帝君及關聖帝君等神祇，不妨順道上香參拜。

Check Point小資料

地點：大埔林村放馬莆村

開放時間：全日

查詢：2638 3678

小貼士：新春期間，大埔林村一帶會因應情況實施臨時交通管制，屆時記住留意警方指示、安排。此外，林錦公路一帶泊車位唔多，搵車位難免要畀多啲耐性。