到獅山Relax Peugeot3008

雖然話香港係石屎森林，不過想搵啲綠意調劑生活，其實又唔難，因為就算身處市區，都總有郊野公園喺附近，今次我哋就拍住標誌（Peugeot）3008，去到黃大仙毗鄰嘅獅子山郊野公園，輕鬆吓、抖抖氣之餘，而且五分鐘車程內，就去到樂富廣場醫肚、補給，夠晒方便。

去郊野公園唔一定山長水遠，獅子山公園就喺正黃大仙竹園道、天馬苑背後，好易搵，不過公園位於一條無名路上，所以唔可以直接揸車到，駕駛一族大可去竹園道嘅天馬苑停車場泊車（收費每小時$11、日泊$60），之後從竹園道樓梯拾級而上，唔使10分鐘就到。

BBQ又得 行山都得

獅子山郊野公園以平地為主，唔使為上斜落斜擔心，而且場內有接近30個燒烤爐，不過正因位置就腳，所以假日經常客滿，奉勸各位BBQ之友喺早上九點前就要嚟「霸爐」。就算唔燒嘢食，一場嚟到都可以行山作樂，以燒烤場側邊作起點，沿住園內石徑往沙田方向，步行約兩小時，就會到公園嘅沙田部分；石徑中途接駁麥理浩徑第五段，全場10.6km，沿途經過沙田坳上雞胸山、再經大老山至飛鵝山嘅基維爾營地，全程需約三小時。

特大天幕 開揚滿Fun

今次陪我哋去獅子山郊野公園嘅座駕係標誌3008，外形集合咗揭背車、SUV及MPV於一身，小巧而破格，尤其是前、後泵把都裝咗金屬泥擋板，形象傾向硬朗化。筆者最鍾意係大天幕，幾乎佔晒成個車頂，大大增加車廂開揚度，拍得住坐開篷車。內籠方面，全車都用咗真皮座椅，車身雖小，不過腿部與頭頂空間都算有交代，加上後排用咗60：40分割式設計，加埋大尾箱，置物量令人驚喜。

上斜好力 隔音了得

性能方面，依靠由母公司PSA集團與寶馬（BMW）合作研發嘅1.6L Turbo引擎，馬力及扭力分別去到156hp及24.5kgm，拍攝當日坐滿五個人，喺獅子山郊野公園外上斜，引擎反應都冇遲緩，之後去到龍翔道一帶以較高速行駛，攻彎時車身都無過分傾側，置身車內依然淡定，而且隔音唔錯，只有輕微嘅路噪與風噪傳入車廂，無論兩口子談心，或者三五知己商量隨後嘅郊遊大計，都可暢所欲言，唔受噪音干擾。

SPEC

車型：五門五座位揭背車

引擎：直四渦輪增壓

容積：1,598c.c.

最大馬力：156hp/5,800rpm

最大扭力：24.5kgm/1,400~3,500rpm

驅動：前置引擎、前輪驅動

傳動：六前速Tiptronic自動波

懸掛：（前）麥花臣 （後）扭力桿

制動：（前）通風碟 （後）實心碟

車身體積：4,365×1,837×1,639mm（長×闊×高）

售價：$299,900

查詢：2834 4233（AutoFrance HK）