一粒鐘洗車DIY

今日適逢年廿八，唔只屋企，就連愛車都要為迎蛇年、洗邋遢，趕唔切同洗車屋落Booking？其實只要快快手手班齊工具，花個零鐘都可以DIY搞掂，唔使大排長龍、又要畀洗車屋趁過年檔期加價外，仲可以當做埋運動消消脂，一舉多得。

其實自己洗車並唔係想像中咁難，只要工具齊全，無論壯男定係淑女，都可於一個鐘左右辦妥。一般嚟講，除非部車有頑固污漬，或者黐咗瀝青，否則一般洗車都毋須假手於人，只要有齊海綿、塵掃、水桶、洗車液、玻璃水、洗軨水、皮革清潔護理劑及吸水布已經足夠，大概$600左右就可買齊，用20、30次都不成問題，每次成本只係廿零蚊，計落年中慳番唔少。

車身清潔有次序

洗車唔算大動作，但先後次序切勿搞亂，譬如行車後，唔好即時向輪圈淋水，否則煞車碟可能因冷縮熱脹而引致變形，影響制動效能。清潔車身時，先用塵掃掃走漆面上嘅灰塵，之後才弄濕車身，用洗車液及海綿清洗，千祈唔好一開始就用濕布拭抹，好易刮花車身。假如閣下有喺車內吸煙，或者帶狗狗遊車河嘅習慣，車廂難免積存異味，最簡單嘅解決方法係放一個消臭罐，大部分異味都會被辟除，仲會散發香氣，幾十蚊就有交易，一罐夠用兩至四個月，非常划算。

污水勿亂倒

想洗車，唔係隨處都可以，最緊要唔好阻到人，多車、人流高嘅地方就絕對不宜，不過太靜嘅地方亦唔理想，萬一遇到匪徒就危險啦！順便提提各位，喺街邊洗車要顧及公德，洗完車，切勿隨街傾倒污水、影響環境衞生，而且喺公眾地方棄置偈油等化學物品，有機會觸犯法例，年尾惹官非就唔好意頭啦！

精選法寶：車身

‧濃縮洗車液（800ml）$110

‧泡沫噴樽 $65

洗車液泡沫豐富，可配合噴樽使用，有清潔及除污功效，適用於任何顏色車漆；以中型車計，800ml洗車液可使用約25次。

車窗

‧玻璃防霧劑（180ml）$65

為免玻璃出現霞氣，應定時噴上防霧塗層，部分防霧劑仲有消除眩光反射效果。

‧玻璃水（400ml）$65

玻璃上有油膜，會導致水撥刮唔清雨水，此時應使用去油膜玻璃水，令玻璃回復通透亮澤。

車廂

‧皮革清潔保護劑（220ml）$88

配方含有維他命E，令皮革保持柔軟，又可輕易去除污漬及油垢，但係先旨聲明，唔適用於麂皮、鹿皮等物料，咪亂試。

‧消臭罐 $68

買個消臭罐擺喺車，便可發揮除臭作用，有效期長達兩至四個月，更划算。

輪圈

‧洗軨水（450ml）$68

有效去除表面嘅頑固污潰及油垢，而且方便易用，簡簡單單向住輪圈噴上適量泡沫便可，污漬就會隨泡溶解，再過清水就會靚番晒。

‧輪胎光亮劑（450ml）$98

輪胎舊咗就會變得暗啞，咁嘅款點揸出街拜年！只要用光亮劑直接噴向輪胎，等15至30分鐘，就會恢復原有嘅光澤，持久性約兩個月。

查詢：2392 4244 （台日汽車精品）