裝App重Boot平板大掃除

年廿八，大掃除最應景。若然仍講電腦大掃除，未免有點單薄，讀者睇怕都未必有興趣睇。皆因呢個Post PC年代，要大掃除當然係平板做主角啦！大家部iPad或Android平板用得耐，都可能會覺得部機愈行愈慢，不妨裝Apps為平板清一清「腸胃」，仲可以裝防毒程式排毒兼擋毒，不過最有效嘅方法，莫過於狠狠地Hard Reset，畀部機重新再Boot過！

iPad篇：揀啱設定不再龜速

iPad用得耐變慢，主因不外乎Apps Icon太多；PDF、影片或者電子書等檔案的連結太多，亦可能使用越獄軟件所安裝程式佔用太多記憶空間。要令iPad變番行得又快又順，可從唔同方法入手，當然最好不要安裝越獄軟件，另外可從內部慢慢調理，如將Spotlight搜尋（設定→一般→Spotlight搜尋）選項減少至最常用的一、兩個就好，同樣地亦可將平常利用Safari上網時所積存的暫存檔案清除（設定→Safari→清除Cookie和資料）。

Hard Reset重新開機

若然仍覺得部iPad未如初買時咁快，可以出Hard Reset（同時長按Home鍵及開關鍵）一招，要知道平時關機，很多常駐程式仍在運作，所以重新開機可令iPad回復應有的運作速度。至於會唔會有惡意程式令iPad行得慢？查實iOS Apps皆由iTunes把關，應問題不大，因而無迫切安裝防毒程式，不過安裝後可減低經電郵、雲端儲存或FTP所下載的有毒檔案經iPad再感染電腦，一裝無妨。

iOS精選Apps：《Virus Barrier》

iPad中毒機會較低，但稍不留神接上雲端儲存空間或從不知名電郵下載到帶惡意程式的附件的機會仍有，《Virus Barrier》就可以掃描所有經由iPad傳送的檔案，連接Dropbox或FTP的「有毒」檔案都可檢查兼修復。

下載費用：$8

《摩貝密盾HD》

相比之下《摩貝密盾HD》費用較昂貴，但功能就比較全面，由檢查iPad入面有冇存在安全漏洞，到發現問題後幫大家修復漏洞，以至實時顯示iPad的剩餘電量及流量監控都一應俱全。

下載費用：$23

《iOptimizer HD》

好多時iPad行得慢都是因為有太多程式正同時執行，《iOptimizer HD》就可實時在Pie Chart上監察處理器及記憶體的使用情況，覺得邊啲程式大食又閒置的話，就關掉它吧。

下載費用：免費

Android篇：掃走惡意程式

Android平台相對較開放，亦因如此，感染惡意程式的機會亦較大。絕大部分傳統防毒軟件生產商都有推出為Android平台而設的網絡安全程式，本身PC已裝有防毒軟件，也有機會可同時安裝到Android平板之上。至於Android平板愈用愈慢的原因，都離不開裝上太多Apps或系統內儲存了太多瀏覽紀錄和暫存檔案，一於趁今日裝個「大掃除」App清清佢啦！

Android精選Apps：《Android Delete History PRO》

話明係PRO版，這個收費貴過Android版《WhatsApp》的程式其實都洗得幾徹底，無論係程式的快取檔案、剪貼簿上的暫存資料、瀏覽器紀錄、瀏覽器Google Maps搜尋資料以至電話紀錄都可以清得一乾二淨！

下載費用：$9.94

《Cache Clear》

同樣都係清除無用的檔案，包括應用程式的暫存紀錄、瀏覽器瀏覽紀錄到搜尋結果等等，《Cache Clear》支援等一捽即洗，甚至可以開埋自動清除系統，依時依候幫大家大掃除，唔使等到慢如龜速先至搞搞佢。

下載費用：免費

《Lookout Security & Antivirus》

貴為經Google Play下載得最多的防毒軟件，功能真係唔需要懷疑，除了一般掃描及修復被惡意程式感染的檔案外，連瀏覽有機會中招的網頁都會發出提示。想要更全面的保護，可以升級成Premium版，但每月2.99美元都唔平。

下載費用：免費