品味挑戰JS Bear "Camo" ＆ JS "Poodle"

當我見到呢兩對2013 S/S最新「JS系列」波鞋時，立刻諗起，到底「謝利美」係咪想學成龍大哥來一個波鞋版《十二生肖》？坦白說早年元祖「熊仔鞋」JS Bear登場時，確實係覺得幾可愛特別，縱使本人無法駕馭其Kawaii本性，但以鞋論鞋立體熊仔鞋舌設計確實係勁，而後來的「熊貓鞋」、「猩猩鞋」、「豹紋鞋」都尚算可以，但上季對「花花熊」一出就立刻「出事」，翻炒熊仔仲要配「重口味」Floral Print搞到噓聲四起。今季更決定打孖上，「迷彩熊」都算為JS Bear挽回一仗，但隔籬嗰對「貴婦狗」就真係有點「走火入魔」，就算戴住副 Jeremy Scott×Linda Farrow「飛翼超」都一樣無面畀，只可以講句：「回頭是岸，施主！」

Pasu Reporter

整容V.S 自然美

以前嘅人難得去旅行，目的純為觀光玩樂，增廣見聞，順便休息充吓電；家陣搭飛機易過借火，旅行不再奢侈，目的變得更具體實在，例如去相睇、整容等。早前小記到韓國公幹，就專登問當地男公關，有關當地人熱衷於整容有咩睇法，佢話呢樣嘢普通到不能，就好似小朋友箍牙，稍有不正就自行找醫生矯正好了，係外國人先會對佢哋嘅技術如此趨之若鶩。其次，站在男士角度看，化妝已經可以為女生改頭換面，其實根本用不着開刀割肉或填充異物，可能佢哋做嘅係化妝品牌，Hardsell就梗o架啦！不過講到化妝，韓國人又崇尚自然美，畫條眼線就出得街咁，好矛盾呢？其實咪就係人工整容後得出一體化的「自然美」，素顏出街都無有怕囉！講到尾其實係想帶出今趟韓國之旅，真係見識咗好多韓妹扮靚大法，又親嘗火燙面的Facial，詳情請留意小記的Etude House報道啦！

Moe Reporter

突然又已一年

不經不覺在這裏待了剛好一年時間，由一個起初成日搞錯Concealer和Mascara、連Christian Louboutin也不認識的黃毛小子，到今日總算分得清楚恒河沙數的時裝、美容、化妝品牌，成為一個勉強合格的「潮流記者」。雖稱不上學有所成，但也有一種幼稚園畢業的滿足感。除了賺到經驗（和5公斤體重），還認識了一班好同事，在此要謝過上司C.C及L.C，以及同事們AMCPESKYA的鼓勵、一眾攝影大佬的照顧，同埋見盡我驚惶失措的化妝師D小姐。

過去一年，仍有許多不足。未來一年，北望神州，盼望能做得更好。

後會有期。

註：編輯A給「小弟」：這篇稿見報之時，相信要自掏荷包買報紙留個念吧？否則錯過這段感人之言，是閣下損失。職場上「人來人往」，早應習慣，但人是感情動物，又怎能沒絲毫離愁別緒？當日遇上你這黃毛小子，已知頗具潛質，心暗喜（無需勞氣）也暗悲，皆因非池中物，又如何困得了？望他日事業有成，還記得曾遇過我這樣一個編輯，然後你會發現：「你是最好的！」

Keith Reporter

Oh My Glasses我的黑超

平日為求造型更完整，所以隨身都有一副「超」傍身，而本土眼鏡品牌Oh My Glasses生意愈做愈大，愈做愈好，圈中明星捧場客有增無減，最近佢哋與本地模特兒莊思敏（Jacquelin）合作推出限量版"Oh My Jac"兩款太陽眼鏡，一款是型格的烏蠅鏡，另一款則是藝術家的圓形鏡，用上黑、灰及糖果等色系，部分加入水銀鏡面，臂架上刻有Q及K字樣，代表兩種型號，星味甚濃。早前，小女子親自到位於中環新開張的樓上店走一轉，試戴了紅色"Oh My Jac"圓形鏡，又幾好睇，讚！

Candy Reporter