日本直擊 CP+狂推機仔

雖然早前傳聞多多，不過一眾廠商喺橫濱舉行嘅CP+相機展上，始終都冇公開大家最期待嘅單反或者Mirrorless無反相機，取而代之係近年冇咁多人關注嘅DC機仔。好似Panasonic就一口氣推出四部新機，更首創加入NFC配對，而Pentax、Olympus、Casio亦有新作撐場，2013年DC界好有睇頭喎！

Panasonic：NFC一拍配對

近年唔少手機都加入NFC用來玩配對兼傳送檔案，估唔到依家連相機都得。Panasonic是次展出DMC-FT5及DMC-TZ40兩部新機，前者以支援13米防水及兩米高防撞，鍾意運動嘅用家就最啱用；後者則備有24mm廣角鏡頭兼20倍高倍率變焦，可以話係輕巧小長炮。不過最大賣點係兩部機內置Wi-Fi之餘，仲可以透過NFC同手機等裝置玩一拍配對，唔使入Menu左調右校就可以無線傳相過手機，超方便！大家亦可以用專用App《LUMIX remote》用手機遙距控制相機各功能，玩味極濃。

DMC-XS1 激薄簡約

講到DC，又點可以漏咗卡片機呢？同場亦有部新機DMC-XS1，唔單止機仔超細又輕，而且仲只得14mm咁薄，現場拎上手簡直好似玩具咁！新機大玩簡約設計，除咗現場嘅黑、白、紅配色外，廠商仲話正研究推出Custom Made服務，畀用家自訂機身花紋及圖案，成事的話絕對有機會成為新一代潮機！另外，此機功能都唔弱，包括1,610萬像素、24mm廣角的五倍變焦鏡頭，亦可以拍攝720p影片，袋喺衫袋隨身攜帶Snap就最方便！

FujiFilm：人人試玩

早前CES FujiFilm就公布咗新作X100s及X20，今次亦有將兩大新機帶到展會上，可以喺工作人員協力下任玩任試，現場人人都爭相試玩，想拎上手玩都唔係咁容易！而另一看點就係廠商搵來美國百貨公司Barneys New York玩聯乘，為XF-1加入九款唔同顏色和紋理嘅皮革，實物又確係幾靚，不過又係限量發售囉！

Casio：跳住連拍

Casio今年就只有Exilim ZR700一部新機，同先前推出嘅ZR1000一樣以連拍為賣點，最多可以每秒30張高速連拍。廠商就搵咗外國Hit爆嘅「Gibbon Slacklines」喺條幼繩上喪跳狂彈，畀大家用相機即時Snap兼睇效果，互動得嚟又可以突出賣點，抵讚！

Sigma：像素制霸

副廠鏡頭數一數二的品牌Sigma，除了展出多支新鏡外，還有以質素見稱的新機DP3 Merrill。新機的外形跟過往的DP系列沒有太大差異，搭載了1,500萬像素×3的感光元件，合共有4,500萬像素，並配備了一支50mm F2.8鏡頭，影人像就最適合，所以現場擺放了超十部機以上畀人任玩，仲有Show Girl等你試真啲呢部人像機。

Pentax：大光圈三防

大光圈DC本身已經夠吸引，若果再加埋三防能力就如虎添翼，Pentax推出全新WG-3/WG-3 GPS和WG-10三防相機，WG-3/WG-3 GPS的防水能力達14米，就算兩米高墮下依然無損，仲有-10℃防寒效能，而且鏡頭具備F2大光圈以及招牌的六顆LED，在水底影珊瑚或者魚仔就唔怕矇查查；GPS版本唔單止具有GPS功能，甚至在機面設有液晶體顯示屏顯示資訊。至於規格較低的WG-10都有10米防水、1.5米防撞能力、-10℃防寒效能，而鏡頭四周僅有五顆LED燈，不過近拍補光都已經足夠。

Q10暴走新色

雖然Pentax Q10屬於無反相機，但其體積細小，勉強都列入為機仔，而廠方在CP+展出《新世紀福音戰士新劇場版：Q》的Q10，特別版有齊初號機、綾波麗和明日香三種版本，配色上都跟足動漫原著，一眼就認得到，而且閃光燈位置仲有「NERV」的標誌，EVA迷又點可以放過。

Olympus：好色「套」裝

平時的DC仔畀盡只有十隻八隻色，不過全新Stylus XZ-10就喺黑色同白色機身之上，推出幾十款機套等你換，好似換衫咁簡單；現場更有工作人員派問卷調查邊種色最多人鍾意。呢部咁繽紛的XZ-10被稱為「低階版XZ-2」，特點是鏡頭用上F1.8~2.7的四倍變焦鏡頭，現場環境幾暗都影到相，更具備1,200萬像素，而最大的賣點是搭載了全新拍攝模式，內置四種併貼效果，能夠把多張相片並合拼為一張趣味相片。當中仲可以玩埋一掃連拍功能，將連環的動作變成連環圖，算係全場最好玩的DC。