破甲而出HT 1/6 Tony Stark

入實驗室唔只要撳緊急掣，仲要手腳快過人！作為Hot Toys最好賣嘅MMS系列之一，Iron Man由Mark I出到Mark VII，部分版本仲有2.0復刻，粉絲買齊嘅話，足夠組隊足球隊連後備陣容。《Iron Man 3》即將上映，一系列新產品乘勢推出，繼1/4半胸像後，以真人Look亮相嘅1/6 Tony Stark連實驗室地台亦已正式登場，素體、組裝都加入新玩法，新鮮感爆燈！

Old Look重手咗

Iron Man以真人Look亮相已非首次，舊時Mesh Test Version就曾經試過，不過當時係電影上咗先，隔咗一排才到Figure上架，今次美國將於5月3日上畫，香港有機會提早一個禮拜，反而HT Figure就讓各位粉絲先睹為快。頭雕繼續出自Kojun之手，配合J.C.Hong塗裝，眼神、輪廓都拿捏得到，瞳孔及鬚根亦巨細無遺，基本上將Robert Downey嘅面相九成還原出嚟，剩低嗰一成，個人認為皺紋及火車軌太多，老態龍鍾成個阿叔咁款，據知Robert都曾經要求試辦整得後生番啲，否則可能更加Old Look。

過癮組裝玩法

盔甲被飛走，素體當然要重新製作，30cm高加30個關節，靈活性不成問題，據HT表示內部仲會首度加入LED及電池，只要撻着背脊開關，心口嘅弦反應堆就會亮起，玩法創新，可惜呢一Part尚未完成，未能夠喺試辦Show出嚟住。附件方面，由於以實驗室做背景，故此連埋唔同嘅盔甲散件，頭盔、手掌都有，其中左前臂仲可以同素體嘅左手切換，小腿裝甲又可以直接穿上，畀Fans過足組裝癮。其他工具亦都大堆頭，草圖、螺絲批、電線、工作枱不在話下，就連機械臂都改良咗，前面由滅火筒變成DV攝錄機，滿足Tony戲中嘅自拍需要。吸收過上次Mark VII一開訂就火速滿額嘅經驗，門市Toy Hunters初一、二、三又會放假休息，粉絲好趁收爐前拿拿聲落訂喇！

HT 1/6《Iron Man 3》Tony Stark

零售價︰$1,780

預售價︰$1,730

推出日期︰今年第二季

查詢︰2388 4677（Toy Hunters）