PowerShot N特效1開5 過癮相即Share
相機界年度盛事CP+ 2013 （Camera & Photo Imaging Show ）剛在日本橫濱舉行。一如以往，各家廠商都推出新機，最令人意外是大戶Canon今年重點並非單反，反而推出超破格的PowerShot N，其的骰設計本身已經夠搶眼，最正係內置「Creative Shot」模式，按一次快門便會隨機幫你後製多五張特效相片，玩法創新又有驚喜，難怪試玩區長期逼滿人！
這部PowerShot N可以話係打破PowerShot系列常規，其方形加大大個鏡頭嘅設計，似足手機影相Apps個Icon，過癮！加上機背有個2.8吋、可以直角90度向上反嘅篤芒，任何角度取景都方便。小記眼見唔少女士都被佢外形吸引，看來市場定位準確。再細心留意此機，點解冇快門鍵？原來其設計好巧妙，快門鍵、變焦桿都位於鏡頭旁邊嘅轉環上面，而且快門鍵仲要上下各一粒，高炒、低炒時快門掣都好靈活。
特效隨機變
外形設計有突破，點知玩法更加出人意表。PowerShot N除好似DC仔般內置Auto及P模式外，更加預設「Creative Shot」模式，只要隨手影一幅相，相機就會即時幫你將原相隨機後製出五款特效相片，每次出來嘅結果都唔同、亦冇得揀，可以話係真真正正嘅隨心兼隨機攝影！雖然Random特效你估唔到，不過都會依據角度、構圖、色彩、光線等方向來製作；現場試玩效果確實幾特別，有啲似《Instagram》。抵讚在新機一次過要儲存連埋原圖總共六幅相，全程都只需一至兩秒，隨手Snap都唔怕跟唔切。
可隨時分享
PowerShot N並非玩具咁兒戲，佢備有1,210萬像素感光元件，並支援八倍光學變焦及最高ISO 6,400感光度，一般Snapshot環境都應付得到。影完咁有特色嘅相，當然要即時Share畀朋友；PowerShot N就備有Wi-Fi功能，更於機側加設「One-touch Smartphone」按鍵，與手機、電腦等裝置配對後，再配合專用程式，一按鍵就可以即時將相片傳到手機或Facebook等社交網絡，方便到暈！機身設計到咁細，就連記憶卡同電池都一併縮水；前者換上microSD後都唔太擔心儲存容量，反而鋰電池得AA電咁細，容量亦只得870mAh，續航力唔知夠唔夠撐呢？
SPEC
感光元件：1,210萬像素CMOS
焦距：28~224mm
光圈：F3.0~5.9
屏幕：2.8吋TFT觸控
感光度：ISO 80~6,400
體積：78.6×60.2×29.3mm
重量：195g
同場加映：PowerShot入門級
Canon亦有推出一系列DC，其中PowerShot A1400及A2600皆屬入門級產品，均採用1,600萬CCD及具五倍變焦；分別在於前者備有光學取景器，而且採用兩粒AA電池，可以隨街買電補給；後者功能與A1400相若，屏幕則由2.7吋加大至3吋，睇相、取景都更舒服！
IXUS新機升格
IXUS方面，有部中階型號、採用1,600萬像素CCD兼支援八倍光學焦的IXUS 132，用上超搶眼嘅彩藍色，輕巧又靚仔。另外亦有IXUS 255 HS，用1210萬像素CMOS，不過卻內置DIGIC 5影像處理器，加上配備24mm及十倍光學變焦鏡頭，規格頗強。此外新機可用Wi-Fi傳送相片到手機、電腦，亦可與指定相機互傳相片！另外新增AUTO模式，可以邊拍片邊影相，DC仔實屬少見。
後記
小記今趟仲參觀咗Canon下丸子總部以及大分廠房，前者設有陳列室，展出大量新舊產品，當中連Canon 1934年推出嘅35mm相機Kwanon仿製品都有，大開眼界！而後者則主力生產EOS 6D、EOS M等相機，睇到Canon相機每個工序都超嚴謹，就連鏡頭蓋上Canon字樣有冇傾斜等細節都好注重，果然貫徹日本人一絲不苟嘅精神。
¥32,980（連限量500套Brown Vintage相機帶及皮套）、¥29,980（連一般相機帶及皮套套裝）（日本四月下旬推出；香港推出日期待定。）
今年Canon Booth都算係各大廠商中最大，設有新機及新技術講座，吸引唔少人參觀。
開機後鏡頭凸出嘅位置都唔算好阻礙操作。屏幕可以90度反起，如果可以180度反芒自拍就更好。
拍埋iPhone 5就知PowerShot N果然係好細部，袋落前褲袋都仲得。
快門鍵、變焦桿都喺轉環上，反應都幾靈敏。
機側設有「One-touch Smartphone」，唔使慢慢入Menu就可以進行Wi-Fi配對設定。
轉入「Creative Shot」模式之後，影完一幅就會自動醒多五款特效，總共六幅相畀你揀。
唔玩Random創意，仲可以用番一般模式，P Mode和Auto之外，仲有魚眼、移軸等幾款特效。
只要安裝《Canon CameraWindow》App，成功配對後就可將相機內相片傳送至手機。iOS及Android版本俱備。
可以傳送至手機、電腦、打印機等裝置，玩無線傳輸確實方便。
雖然今年冇出DSLP大機，不過就有推出冇耐、最輕全片幅機EOS 6D畀大家試玩，仲特登搭咗個森林場景，勁多人排隊呀！
PowerShot N賣點超特別，難怪咁多人圍住個試玩區，想試都起碼要等十五分鐘。
在場亦有擺放專業級攝影機C500，唔少日本電影都係靠佢拍出嚟。
近年一眾型號機款以及EF鏡列陣，幾壯觀！
現場仲有長鏡試玩區，有800mm長鏡任玩，梗係要玩個夠本！
靚女遍布全場，連Reception都好省鏡。
PowerShot A2600比A1400高貴，用鋰電之餘，屏幕亦增至3吋。
PowerShot A1400設計平實，不過實物超輕。
IXUS 132係一貫經典IXUS設計，用上彩藍色都幾省鏡。
IXUS 255 HS機能最齊備，再加上係日本製造，有睇頭！
同場亦有日本型號IXY 110F， 具備1,600萬像素CCD、28mm加上八倍光學變焦，亦支援Wi-Fi，功能介乎IXUS 132及IXUS 255 HS，唔知香港會唔會推出呢？
下丸子總部離市區唔算好遠，不過梗係唔係人人都入得啦！
Kwanon設計經典，最重要係仲用公司舊Icon兼舊名。