隱世小屋

做潮流記者除咗要四出借衫做Styling之外，最頭痛莫過於搵地方影相！近日小記就為此感到非常煩惱，幸好大學時期被訓練成資料搜集的達人（俗稱起底組），上網尋尋覓覓後終於發現一間環境優美的隱世小屋，無奈網站上並未有屋主的聯絡方法，所以小記便發揮鍥而不捨的精神「起底」，最終成功找到主人Keith借出安樂窩進行拍攝。屋內的裝飾富有50年代的英國風情，而且使用的家具都是屋主辛辛苦苦在世界各地搜羅，非常優雅兼有格調。屋外花園更有無數的綠色植物襯托，相信春天來臨時百花盛放定會非常美麗，如果春天有機會可以再去影相就好啦！

Alex Reporter

環保利是封

過完聖誕冇耐，又要準備過農曆年，本來過節理應好高興，不過當中會造成好多浪費，例如聖誕卡咁，又或者過年派嘅利是封，由於大部分都係用紙造，尤其係印晒生肖嘅利是封，第二年就唔用得，除非再擺多12年。眼見呢排有好多品牌同商場陸續推出蛇年限量版利是封，但我就比較欣賞LCX嘅出品，因為香檳金色的封面，夠貴氣得來簡潔，又無印上任何生肖，後面嘅封口，就以「如意結」書籤取代自動黏貼，可以循環再用。不過呢啲利是封冇得買，但可以喺LCX購物滿$1,000或以上換領。

Amy Editor

首試桃紅櫻唇

早前為咗迎接小寶寶，捱咗九個多月「齋戒期」那段「烏Where」日子後，後遺症便是肆無忌憚的搽甲油、唇膏等扮靚的產品，目的只求回復靚樣。本身只會搽潤唇膏而不愛搽唇膏的我，依家隨身備有數支不同顏色的唇膏，不過講到最愛都是Chanel最新的桃紅色Rouge Allure Velvet！以前從未試過咁搶眼的唇色，最初試用都有啲睇唔慣，怕太過令人注目，不過凡事總有第一次，之後睇睇吓又唔覺得誇張，原來好多事情只要放低執着，持開放態度，結果可能係出乎意料的「好」！

Kiki Reporter

星級年曆

品牌時興找明星做代言人，希望借其人氣帶動品牌的銷售額。韓國就特別鍾情年輕偶像明星做代言人，衣食住行樣樣有齊，好似當紅的韓國組合Big Bang就經常被各大品牌睇中，尤其是隊長G-Dragon就有不少國際品牌向佢招手，而最近佢做咗服飾品牌BSX嘅韓國代言人，只要在店舖消費滿一定金額就可獲得G-Dragon的年曆。可惜只限韓國當地，作為忠心粉絲的小記就只好託朋友千辛萬苦在韓國取得一個（各大分店都嚴重缺貨），再次證實韓風威力之大！

Yilam Reporter