《Dead Space 3》自砌武器靠嚇

有睇頭嘅新Game會陸續喺二月推出，打頭陣有EA嘅《Dead Space 3》。遊戲出到第三集，終於加入咗新意，今集場景可以跳出密封式的太空艙，喺冰冷星球上為生存而戰；同時亦有新主角John Carver夥拍Issac Clarke出戰，雙人Co-op模式時更加入特別幻覺模式。而遊戲系列最有名嘅驚慄橋段仍然保留，出其不意出招嚇玩家！

逃出密封太空艙

《Dead Space》系列有招好煞食，就係將場景設定在密封的太空艙入面打外星怪物，更可以對應無重狀態，喺太空艙內飛來飛去。不過集集都係密封的太空艙，變化有限，所以今集就講兩位主角同其他隊員會衝出即將爆炸的太空船甩身，向冰冷星球Tau Volantis進發。而該星球生存環境是極大考驗，要全身而退並唔容易。至於《Dead Space》系列會唔會係一套三部曲作品？官方就話，大家完成晒成個遊戲或者會有答案。今集遊戲仍然採用開發公司自家的Visceral Engine，由於有前兩集開發嘅經驗，所以光影效果皆比前作為佳。

新點子雙人Co-op模式

本作加入新主角John Carver當然係別有用意，就係同時追加雙人Co-op模式，甚至乎可以隨時加入或退出雙人模式，玩起來甚靈活。雙人玩法比單人內容豐富，可以去到單人模式去唔到嘅版圖，又可開啟唔同機關，甚至乎John Carver同Issac Clarke所見到嘅景物都有所不同。好似喺生物設施入面，John會見到Issac所見唔到嘅公仔。而John更會在某啲場景產生幻覺，呢個時候控制Issac嘅玩家要保護控制John嘅玩家，玩法都幾特別。另外從示範片段可見，雙人模式對應Kinect聲控操作，可以「出口術」補給彈藥及更換武器，不過暫時就未知港版會唔會有呢項功能。

改裝武器二合一

之前《Dead Space》最令人留下深刻印象嘅武器，毫無疑問係Plasma Cutter；今集改良咗武器系統，可以畀身為工程師嘅Issac改槍，喺Weapon Bench入面利用各種零件組成各種武器。最基本設定係可以組裝一支輕身的單手操控武器，又或者一支重型雙手提攜的武器，並可用現成零件改裝，升級用緊嘅Plasma Cutter火力，甚至可將Plasma Cutter同Flamethrower合二為一，令武器數目幾達無限。玩家砌槍冇Issac咁叻都唔緊要，遊戲本身都預備咗好多藍本畀大家，嫌麻煩都可以隨手揀一款，即時開戰！

INFO

類型：第三身射擊

開發：Visceral Games

平台：Xbox 360、PS3、PC

推出日期：2月5日

售價：$449 （Xbox 360、PS3）、$389 （PC）

查詢：3166 6001