鬼馬阿Bob魔術碟當寶
魔術只不過是「掩眼法」的小玩意？其實是頭腦與身手兼備，既娛人、亦可自娛的藝術才是。既是DJ，又是電視節目主持，最近還參演電視劇的「阿Bob」林盛斌，不但是搞笑能手，而且醉心鑽研魔術10多年，就靠逾300張的相關教學影碟，加上多不勝數的道具，練就一身鬼馬魔功。
做藝人要多才多藝，阿Bob除有一把獨特聲線和一副搞笑面孔，還有一雙會變戲法的手，原來他由小到大都奉大衞高柏飛（David Copperfield）為偶像，中學時期已懂得用啤牌示範簡單的魔術，大學時更用魔術搞氣氛，睇到同學們o依嘩鬼叫，阿Bob回憶道：「玩魔術可以為身邊嘅朋友帶嚟歡樂，感覺好正！」
當DJ重操故業
其後投身社會工作，阿Bob曾經脫離「魔道」一段時間，直到當了DJ，因而多了機會表演，令他可以重新將「雕蟲小技」變成「發揚光大」，他憶述：「想當年每個月出咗糧，就去買魔術教學光碟，學完一張又買一張，期間又會買埋相關嘅魔術道具，如是者都Keep住買咗四、五年，結果儲落大堆光碟及唔少道具，有小部分仍未開封，至今一直當係寶嚟收藏。」
導觀眾入局
在眾多魔術光碟中，阿Bob特別對人體漂浮（Self Levitation）又愛又恨，他解釋說：「一個人點先可以唔受地心吸力影響，做到凌空升起？我覺得係最有趣、最Amazing嘅魔術。」，不過他接着說：「每當睇完碟、知道箇中奧秘後，就會覺得不外如是，有受騙的感覺，Anyway，魔術從來都係咁㗎啦！」
表演魔術除要有一雙巧手，很多時還要有道具幫助，在阿Bob的芸芸道具收藏中，大部分都是小巧類別，像啤牌、硬幣、筆和戒指等，最大的只是一個500ml汽水樽，阿Bob表示：「好多時，其實觀眾先係最佳嘅表演道具。皆因魔術係一種表演藝術，點樣完美咁示範出嚟，得到觀眾掌聲，更係一種學問，當中最大嘅滿足感，係自己可以透過魔術，將快樂帶畀其他人。」
林盛斌（阿Bob）
變變變精選收藏
有了這套教學光碟加道具Boxset，「啤牌穿玻璃」這類神乎奇技都難不倒你。
戴上這枚魔法指環，便可隔空移物，勁過特異功能。
幽默風趣的Jay Sankey（上），在影碟中盡展搞笑啜核的表演手法，深得阿Bob喜愛，至於人體漂浮的解構影碟（下），令阿Bob對這項表演又愛又恨。
用這支神奇墨水筆在紙上寫字，字體會無端端消失，Magic！
Bob最愛
眾多魔術道具中，阿Bob最喜歡這副隱形啤牌，玩法最簡單又最有氣氛，無論你心中想着哪一隻牌，阿Bob都有方法知道。
全靠這隻有「預知能力」的手指公套，魔術師便可「早你一步」知道閣下將會說出口的幸運數字。
還原靚靚筆，可以插穿啤牌，亦可瞬間還原。
據阿Bob表示，你在這本筆記簿上寫了甚麼，魔術師一樣可以「睇穿」。
蠱惑可樂樽，稍施魔法，樽蓋便會跌落水樽內。
魔法銀仔，一咬即破，竅妙何在？阿Bob話無可奉告。