地球大減價

筆者喜歡地理，是個可以對着地圖樂上半天的怪人，也一直希望擁有地球儀，但卻一直沒有買地球儀。何解？細尺寸的，資料不足；大尺寸的，怕沒有地方擺放，又嫌售價偏貴─始終，地球儀屬「唔等使」之列。直至上周，在某巨型玩具店的月下貨清倉區發現直徑30cm的地球儀，資料精細，又曉發光，更要半價，$150便可實現多年來的無聊夢想。

Tony Editor

花旗漢堡

雖然筆者唔使好似TLC台播緊嘅「Fast Food Maniac」主持咁，要個個禮拜穿州過省試勻各家美國出名快餐店，但一場去到花旗國，唔食番餐「Junk Food」，同冇去過有乜分別？早前因工作關係由L.A.搭五個鐘車去Vegas，隔幾日再搭番轉頭。車程中途歇一歇腳，食咗餐都算幾有名嘅「In-N-Out」漢堡包，中間嗰層牛肉漢堡更係即叫即煎，唔似大家食慣M字頭咁全部整定晒，食落都算幾好味、幾Juicy，價錢都唔貴，不過就要等！其實舊年「In-N-Out」曾經喺香港搞咗次試食會，仲話有機會在香港開設首間境外分店，不過到依家都仲未有聲氣！講講吓，好懷念「Wendy's」、「Fatburger」同「Jack-in-the-Box」添！

Brian Reporter

Rain告魯斯

《Top Gun》在小記讀中學時上映，我敢講當年沒有一個男生會不恨做《Top Gun》裏的Tom Cruise。本身已經夠靚仔，還要是美國海軍天才機師，駕駛着F-14戰鬥機周圍飛，最後還贏得美人歸。時光飛逝，連《Top Gun》的導演Tony Scott都已經歸天，小記睇了這套由韓國拍攝，阿Rain主演的《壯志衝天》，講述阿Rain是韓國空軍天才機師，但因不守規則而遭降職，最後從失意中站起，成為保護韓國的英雄……甚麼？劇情熟口熟面，無所謂啦，如果天堂都有版稅收，Tony Scott應該很高興。

Angus Reporter

超方便洗車器

有人話，買車容易養車難；計我話，洗車其實仲艱難。先唔講洗完車即落雨，又或者被洗車仔刮花車身呢啲谷氣嘢，自己洗車更係辛苦無比，既要受陽光暴曬，戶外街喉更係愈來愈少，單係裝水就要走幾轉，腰骨都斷！幸好，祖國創意發明多的是，好似小記早排淘嘅呢個「車邦士」電動洗車器咁，唔單止水箱有成25L，毋須不停換水，接駁車叉後，高壓電槍仲識自動噴水，輕輕揚一揚手就能沖走車身沙石，超方便！最正係成套裝置連毛巾、清潔液等都係承惠165人仔左右，出去洗兩次車都喺番度啦！

Gilbert Reporter

豪食蠔

有啲人對蠔敬而遠之，鍾意食嘅人卻食停唔到口，而小記就好明顯屬於後者。電視上成日教人食蠔有好多嘢要注意，其實鍾意食蠔嘅人，要注意嘅主要係自己個荷包。好似小記咁，搵到呢間深水埗嘅隱世食堂，$58包四隻美國石蠔，先敢一氣叫夠一打，計起上嚟仲平過「吉吉島」。如果去其他蠔吧食，呢個價肯定一半數量都冇。一打生蠔直接放入口，海水鹹味同Creamy嘅感覺真係爽，不過加埋其他菜式，結果每人都要科水三百幾蚊，對於糧尾嘅小記來說，真係一個沉重打擊。

Michael Reporter