on.cc 東方互動主頁

機殼Mix & Match Nokia Lumia 620

Mix and Match是時裝重要一環，以便穿出個人風格。估唔到依家連手機都玩Mix and Match，所講嘅係Nokia入門新寵Lumia 620，首度採用「Dual-shot」設計，在同一機殼配置底、面兩層顏色，大玩霧面或光面兩種層次感！加埋同樣可變色調的WP8方塊介面，今個冬天最「好色」必定係佢！

機身小巧手感佳

近年手機發展一味愛鬥大，屏幕閒閒哋都5吋以上，雖然眼界是開闊了，但每每要雙手操作，長期使用攰死人！Lumia 620回歸基本步，屏幕僅有3.8吋大，厚度及重量亦分別只有11mm及127g，正面看只比八達通大少許；配合微微彎曲、符合人體工學設計的機背，手持好啱手形。而為了提升操作靈活性，機身在返回、Home及搜索三個輕觸式按鍵外，還提供快門掣，而且全部間距適中，機仔細細都唔怕誤按。

兩層機殼玩撞色

自iPhone流行後，手機顏色離不開黑白灰銀。出過8210、3310等換殼機的Nokia當然不會隨波逐流，Lumia 620就首度採用「Dual-shot」設計，簡單來說，機殼是由兩層膠料製成，表面是一層透明或磨沙膠料，內裏則是另一層實色膠；以測試機為例，就是透明綠加實色黃，互相撞色下極具層次感。其餘顏色還包括紅、黃、藍、黑、白，每款都有不同的撞色效果，保證Eye-Catching！

雙核心運作流暢

基於定位入門，此機的硬件配套唔算標青，屏幕解像度及鏡頭像素分別只有800×400及500萬，處理器亦只是1GHz雙核心級數。然而，由於WP8系統唔大食，因此撥頁、上網以至打機都頗為流暢；加上介面是繁體中文兼提供倉頡輸入法，本地用戶應該冇嘢投訴。說到系統，WP8沿用方塊介面，用戶可放大縮細之餘，還可更改主題用色，輕鬆就能創造出別具風格的個人介面。