好炒得 神級像真 EB 1/6 Michael Jordan

若果外星人入侵，提出以籃球1 on 1決定地球命運，邊位球星最夠資格孭飛保護地球？唔使問阿貴，梗係Michael Jordan啦！波神雖然已經退役10年，但係神技、鬥心，加上數之不盡嘅Money Ball，大家依然歷歷在目，當正佢神咁拜。好彩地球未有外在威脅，波神今年又50大壽，全球各界都要賀一賀佢，本地薑Enterbay就炮製出波神1/6 Figure，推出首日已炒高至$5,000，不過各位球迷唔使慌，因為由即日至2月3日都仲有得賣，但係每日配額不同，仲唔快快排隊入貨！

香港嘅Action Figure唔只贏質素，而且膽識過人，EB去年就破天荒推出NBA Figure，頭炮Kobe Bryant，口碑、票房雙贏，勢頭咁好，點可以停？最近就推出全球首個獲官方授權嘅1/6 MJ Figure，神級頭雕配像真度高嘅波衫、波鞋，全球限量2,500套，原價$2,188，首日開售已經炒到$5,000高位，依然大把人搶，正如HK-Kicks.com波鞋收藏家Horace話齋︰「波神Figure，幾貴都要買返屋企供奉啦！」

籌備五年終圓心願

那些年，籃球係好熱血嘅，手揸一本《Slam Dunk》、腳踏一對Air Jordan，眼望MJ跟Magic Johnson及Reggie Miller嘅大鬥法，依家諗番都熱血沸騰。身為80後、EB老闆Bill爺都係飲MJ嘅奶水大，為波神出1/6 Figure係佢多年心願，Bill爺解畫︰「整個構思源於2007年，最初接觸NBA，經佢哋轉介先知道MJ嘅玩具版權原來歸Upper Deck所有，之後我同嗰邊不斷電郵聯絡，但係屢次碰壁，直到2010年，我將一啲Figure作品畀佢哋睇，加埋詳細嘅計劃書，終於感動到佢哋批出版權，當然背後版權費係天文數字啦！」

手臂肌肉見線條美

就同電影《一代宗師》一樣，雖然幾經波折，又要人等到頸都長，不過見過呢款1/6 MJ嘅真身後，粉絲嘅等待絕對值得。經過李小龍、T-800嘅磨練，頭雕師Scuderia嘅功力更上一層樓，由佢主理嘅MJ頭雕，神似度絕對真人咁款，微微向上尖嘅光頭、筆挺有肉嘅大鼻子、上窄下寬嘅耳殼，以至打波時微微凸起嘅青筋，種種特徵都忠實還原，假如表情唔係咁木獨、改為伸脷嘅話，擺甫士一定更加入型入格。Body就採用新開發嘅NBA-MJ素體，全身有30個關節，13"高度就參考MJ實際身高設定，比一般12" Figure更有氣勢，手臂肌肉都跟足真人，有晒線條美，唯一要鬧係小腿過於光滑、欠質感，唔夠手臂咁Human-being。

45號做頭炮

MJ總共打咗15個球季，無論造型、波衫以至AJ都歷經多代變化，或者基於商業考量，以及為咗貫徹「I'm Back！」嘅主題，今次Figure並非最深入民心嘅23號造型，反而揀咗1995年3月19日第一次作客復出個款，所以身穿芝加哥公牛嘅45號紅色波衫，腳踏當時嘅黑白紅AJⅩ，其他配件包括10隻造型手掌、一個Spalding磁石波、一個印咗公牛Logo及支架可隨意扭動嘅地台等，至於護肘、護腕及護膝都按足比例製作，穿戴位置跟足MJ習慣，又可以將部份關節位遮蓋起嚟，一舉兩得！

查詢︰2332 3615（Enterbay）

Bill爺爆料

S：The Sun　

B：Bill爺

S：今次MJ率先用45號造型亮相，日後又有邊啲造型？幾時出場呢？

B：我哋暫定會推出五個系列，每個系列跟一個頭雕及三對AJ，仲會先出限量版，之後有普通版。白色45號只會喺海外發售，而最受注目嘅23號配AJⅡ、AJⅩ及AJ ⅩⅠ暫定三、四月出。另外，射波樣嘅SeriesⅡ會喺動漫節推出，日後仲有伸脷Look、奧運版甚至全明星版，務求重現MJ生涯中每個亮點。

S：除咗MJ，其他NBA球星嘅開發進度又如何？

B：Lebron James暫定四月派貨，其後仲有Blake Griffin、Derrick Rose及林書豪等。為咗重現公牛王朝鐵三角，Scottie Pippen及Dennis Rodman嘅版權亦在洽談當中，成數頗高，希望可以盡快同大家見面啦！

珍藏展必睇

為隆重其事，EB聯同HK-Kicks.com由即日至二月三日期間，喺尖沙咀活方商場舉行大型MJ珍藏展，除咗展示一系列MJ Figure，仲有大量相關嘅籃球珍品供球迷朝聖。

AJ復刻陸續來

賀壽大禮唔只Figure一招，Nike早已事先張揚，今年會復刻多款AJ，今期就有AJ Ⅴ及ⅩⅢ，前者採用經典嘅白×黑原色，即係連《Slam Dunk》流川楓都着嗰款囉；後者係黑×紅版本，踭位以至鞋底嘅圓形雷射標誌都忠實重現，可惜鞋面上嘅白色圓點棄用原來嘅3M，還原度唔及AJ Ⅴ。

查詢： 2388 3348（旺角花園街Nike Basketball）

2520 0771（灣仔莊士敦道Nike Basketball）