百二蚊偽木殼

一直想買個木紋iPhone 5殼，上外國網一睇，款確係靚，但價錢要幾百蚊，連埋運費真係玩唔起。呢個時候，轉移國產購物網，輸入「iPhone 5」及「木質」兩個Keywords，就即時彈出好多選擇，平到三、四十蚊人仔都有，不過太平又似乎信唔過，都係揀個貴少少穩陣啲。好似呢個剛入手嘅殼，標榜經十幾個工序、幾個小時生產；佢係竹做，無實木咁重，望落去色水同款式都OK，因此一買就買咗兩個。收貨後，實物都做得唔錯，啲榫位同啲端子位都幾對位，每個盛惠孖八人仔，連埋運費都係$120一個，都幾抵玩。

Brian Reporter

亂買酒飲

前陣子逛那些沒有中文名稱的高檔超市，可能我見識少吧，看見那些沒有中文名稱的高檔啤酒，覺得很新奇、很有趣似的，糊裏糊塗便買了兩支回家。那樽高挑一點的，是黑啤，跟我以往喝過的樽裝黑啤一樣，像冷凍不太鹹豉油，古怪；至於那樽短小一點的，是朱古力啤，味道猶如口含朱古力再喝啤酒，也古怪。對不起，可能我喝酒少吧，似乎喝汽水較適合我。

Tony Editor

Las Vegas睇Good Show

早前去咗拉斯維加斯，喺嗰度唔睇Show就等如去城隍廟唔求籤一樣︰「白去」！原先鎖定《Blue Man Show》，很想看看幾位「藍精靈」點樣用音樂感動觀眾，可惜去到才知星期三No Show，勁失望！幸好當地仲有大把出色劇目，好似太陽劇場嘅《KA》咁，就將京劇、雜耍、皮影戲及空中飛人共冶一爐。雖然冇對白，但單靠以上元素一樣叫人眼界大開，難怪門票要US$175一張，買飛時仍大排長龍！

Gilbert Reporter

平玩黑夜之神

唔好以為小記買咗邊隻玩具Figure，其實只係買咗部「中古」數碼相機。呢款大光圈機仔已經出到第二代，就係貪佢第一代二手價夠平，千幾蚊就有交易，質素好過晒市面上二千蚊以上嘅新機，最重要F1.8光圈真係好夠大，黑媽媽都可對到焦、影到相。

Michael Reporter

長興格仔

近日有個朋友仔生日，左揀右揀，買了個充滿英倫風味的Ciesta格仔相機袋送畀佢，個袋用料唔錯，只係賣$450。小記知佢一定鍾意，皆因佢經常着格仔衫，加埋個格仔袋簡直襯到絕。由頭到腳都係格仔，聽落好似好大整蠱，其實只要唔撞色就好有型，不過型呢家嘢係對人唔對事，個人本身夠型，着乜都一樣。

Jason Reporter