農曆年租車細節要清楚

農曆新年係租車嘅黃金檔期，所以雖然有成個月先過年，不過有心租車者，依家就好盡快落Booking。「大昌行汽車租賃」就特備日租及4日3夜嘅套餐畀消費者選擇，而且由小型車、MPV以至商用車都有得租，無論係兩口子小家庭，抑或三代同堂，都可搵到至Fit選擇，到時無論買年花或拜年都不用愁。

租車時無論揀邊款車，攞車及還車時都有唔少注意事項。首先，若然你所揀嘅係大熱型號，好似今次示範嘅日產（Nissan）揭背車仔Note，或者本田（Honda）MPV Stepwgn，好多時都會供不應求，攞車時租車公司會唔會改用其他型號代替？事前記緊問清楚。

收費分類　各有細節

揀定車款後，就要留意租用時間，若果以一日計算，是否以足24小時作準？除此之外，唔少租車公司，交車時都以滿缸（Full Tank）計算，即係100%油量狀態，所以還車時，客戶都要入番滿油，否則租車公司可能會另行加收油費。如果你係新牌者，更要留意租車條款包唔包埋保險，萬一發生交通事故，或者部車被偷，到底係由租客全數賠償，或者另有「墊底費」？就連衞生問題都要關注，若然還車時車廂布滿垃圾，亂到好似「第三次世界大戰」嘅話，租車公司有權問你收番清潔費。

車身內外　檢查事項多

問清問楚後，可以馬上攞車吧！咪住，為咗保障雙方利益，攞車時，客戶與租車公司職員都要一齊檢視全車，有任何大小問題都要記錄在案，例如輕輕推一推前、後泵把，睇睇有冇移位或者鬆脫，跟手再Check埋輪胎夠唔夠氣、輪圈有冇損毀，之後開埋頭冚睇清楚；車廂方面，就要同車行職員一齊記錄行車里數，順手試埋冷氣、水撥、頭尾燈、指揮燈及死火燈等，確保安全之餘，萬一有燈號着唔到，駕駛者有機會被檢控o架！至於還車地點亦要問清楚，部分大型租車公司都有多個還車地點，方便租客選擇，客戶亦最好Mark低租車公司嘅服務熱線，萬一用車期間發生任何問題，都可以求救有門。最後，還車後單據最好要保留一段時間，以防用車期間被人抄牌或者影快相，汽車公司收到告票時，你都有相關文件跟進。

收費小資料

以大昌行汽車租賃為例，就會喺2月8日至15日期間，推出農曆年租車計劃，分日租及「4日3夜」兩種，注意由於農曆年係租車超旺檔期，有心嘅話就要及早查詢。

小型車　Nissan Note

日租　$1,105起

4日3夜（第1日早上10點半至第4日晚上7點半）$2,470起

行政房車　Honda Accord

日租　$1,430起

4日3夜（第1日早上10點半至第4日晚上7點半）$3,380起

MPV　Honda Stream 1.8

日租　$1,430起

4日3夜（第1日早上10點半至第4日晚上7點半）$3,250起

商用車　Toyota Hiace

日租　$1,170起

4日3夜（第1日早上10點半至第4日晚上7點半）$2,600起

網址：www.dchml.com.hk　

查詢：2768 2277（大昌行汽車租賃）

＊收費隨車款型號而異，詳情請致電查詢。