千「呼」萬喚終現身!

每季Chanel Fashion Show嘅衫同手袋都會成為時裝界話題。好似上年10月喺巴黎SS13 Fashion Show出現嘅巨型呼拉圈手袋Hula Hoop Bag，一出場即成為全球熱話，大家仲議論紛紛個手袋會唔會真係投產發售，當時有說呢個巨型手袋只係Showpiece，品牌只會推出Mini版以饗各位品牌粉絲。

仲以為冇機會可以見到個手袋真身，點知上星期去品牌個SS13 Presentation，呢個Runway版巨型Hula Hoop Bag竟然出現，仲成半個人咁高！睇實物效果當然震撼，即刻孭上膊試試，個手袋真係分量十足，至少十磅八磅咁重，所以真係好佩服個Model孭住個袋行晒成條Catwalk！至於個Mini版其實都好正，色彩繽紛拎上手仲好鬼Kawaii，同埋出奇地都幾易襯衫。相信呢個手袋今季定必熱搶，好快會出現喺各明星闊太手上。

Sanna Senior Reporter

「甜美」男模

當潮流記者最開心莫過於做Styling，因為除了可以訓練自己的服裝搭配技巧，更可以將自己喜愛的時裝介紹給讀者。但由於潮流感覺未必可以全靠文字表達出來，所以有時候一輯好的相片可算是決定了一篇稿的「生死」，而Model的Pose亦成為重要關鍵！近日做Styling時遇上了幾位「甜美」男模，實在令我哭笑不得，其實他們非常專業亦超級靚仔，工作時與小記、化妝師及攝影師相談甚歡、氣氛融洽，但他們可愛之處就在於擺Pose時竟然不經意流露出「少女味」，尤其鍾意「夾腳」，就連同事看過照片亦覺得非常搞笑！不過小記好喜歡跟這些有禮貌、專業又可愛的模特兒合作，很期待下次跟你們一齊再夾腳！

Alex Reporter

Kenzo令人迷上癮

以往對罌粟花的印象只停留喺「有毒」、「粗生」，直至KENZO推出Flower香水，那獨特的白麝香味確實讓人留下深刻印象。

曾於2008年出任代言人的舒淇再度獲得品牌邀請，成為2013年的新代言人。最近小記出席品牌的廣告發布會，新廣告講述罌粟花的故事，穿上紅色長裙的舒淇化身花仙子，潛入水底摘花，還在巴黎打造出一片花海，浪漫至極。計我話，無論係舒淇定係支香水都有令人迷上癮的感覺！　

Yilam Reporter

扮靚保護鯊魚

Chantecaille每年都會支持海洋保育而推出限量Palette，今年都唔例外，為呼籲中國人少食魚翅，保護瀕臨絕種的鯊魚，於2013年春季新色中推出一盒四色、印有鯊魚鰭圖案的「Save the Sharks Palette」，並將Palette收益所得的5%，撥捐以香港及巴黎為基地的海洋保育組織Bloom Association以作支持！

早前為隆重其事，品牌刻意揀選了支持海洋保育的餐廳Watermark舉行發布會，大會更刻意印製一張「喜帖」，內裏是講述鯊魚如何被大量捕獲，如何影響海洋生態的資料，目的為呼籲港人在喜宴少食、甚至不吃魚翅，藉此保護海洋生態。呢個Idea夠晒心思又令人印象深刻，所以鍾意扮靚的女士們，快手買盒Palette響應下！

Kiki Reporter