拉斯維加斯CES第二擊LG OLED TV革命曲

CES開Show前，LG已事先公布會有OLED TV、Ultra HD TV、Laser TV同埋Google TV列陣，陣容本已夠強，點知仲有「皇牌」未出：除事先張揚會在三、四月於韓國及美國開售的55吋OLED TV 55EM9700外，LG更擺出三部55吋曲面OLED電視，欣賞3D畫面時比平面電視更勝一籌！雖然仲未知道幾時正式開賣，不過呢個秘密武器確實震撼整個CES會場！

OLED TV：55吋OLED TV 最早三月供貨

今年CES（即美國國際消費電子產品展覽）電視焦點都係OLED TV同Ultra HD TV之爭，未嚟之前仲以為有4K電視之稱的Ultra HD TV普及程度應會比OLED TV快，但參觀完CES之後應要改觀，皆因多間廠商都努力投入OLED TV市場！不過真正有能力在今年內推出OLED TV的廠商並不多，至於LG正是最快供貨的一間，三、四月便會在韓國同美國供貨。而首部55吋OLED TV 55EM9700其實於上個月曾運到香港展示，美國開價12,000美元，折合港幣約$93,600，並非貴到高不可攀，相信有助OLED進一步普及。

WRGB顯示技術 更光更靚

到底OLED TV同現時LCD及LED TV有幾唔同？OLED TV機身造得夠薄，如55EM9700，顯示板層數減省了，令電視機身厚度激減至4mm，薄得實在跨張。現場見有部以高身底座支撐的55EM9700實物，有人撞到舞台時竟會輕輕震動，可見相當輕盈！另外OLED TV由於像素可以做出絕對黑位，對比度可以去到無限，色彩表現層次極強，左睇右睇都唔會見顯示上有死角位，近乎180°任睇；再加上LG在RGB三原色上加入白色濾光片，稱為WRGB技術，令到顯示亮度更強，完全可以將現時的LCD同LED電視比下去，正因如此，吸引了大批參觀者睇到唔願走！

彎面OLED TV 立體感更強

至於「秘密武器」曲面OLED TV又有幾特別？一般平面電視，畫面兩側邊位距離眼球較遠，畫面睇落會冇咁銳利；LG EA9800系列曲面OLED TV採用5°向前彎設計，令畫面中間和旁邊位置都跟眼球距離大致相等，即係畫面上每個位置都咁靚。以現場曲面OLED TV EA9800系列跟平面55EM9700比較，可睇到兩者嘅即場3D顯示效果，曲面設計觀感上會稍勝，立體感表現更強。如要筆者畀分，平面OLED TV會畀「A+」，而曲面電視就會畀「A++」！不過大家睇開平面電視咁多年，唔知霎時間睇唔睇得慣彎嘅電視呢？

UHDTV：55吋、65吋 Ultra HD TV上市

OLED TV擺放在LG展區入口左面，而右面就係Ultra HD TV，可見LG唔係厚此薄彼。今年差不多全部電視廠商都有展示Ultra HD TV。大家都應該還有印象，LG部84吋Ultra HD TV機王84LM9600已經在香港開賣，今次在CES上都以這部84吋4K電視作主打，另外順道公布埋兩部尺寸較細、分別為65吋及55吋的Ultra HD TV，標準功能都落齊，一樣內置兩個15W重低音器的2.2音響系統，亦支援3D Depth Control同3D Sound Zooming技術。對用家來說，即係可用較低的價錢去體驗4K的超高清細緻畫質！

Smart TV新玩法：隔空連線 玩手機高清遊戲

LG Cinema 3D Smart TV的軟件部分今年也變得更Smart，支援SmartShare功能，可藉WiDi和Miracast技術，將手機內的影片以Mirror或Transfer形式傳到電視上播放，做法有點似AirPlay；另外現場有示範如何以無線方法連接手機，在電視大畫面上以全高清及3D顯示方式玩手機遊戲。小記親身試玩過，效果真係唔錯。

此外，LG為咗推自家流動印相機，展區有Cowgirl打扮的工作人員周圍幫人用手機影相，然後以NFC技術隔空打印2R相片送畀大家留念，呢條橋都唔錯，如果佢哋啲攝影技術可以高啲嘅話就更美滿。

新Magic Remote：遙控器及軟件皆升級

Ultra HD TV會跟埋新款全銀色的Magic Remote遙控器，可控制電視內的Smart功能，款式都幾似現時黑色的Magic Remote，惟現場未有實物可玩，只能隔住玻璃觀看。

另一款圓形頭的Magic Remote功能跟新銀色款差不多一樣，但主要係為一般Cinema 3D TV而設，除可以用上Magic Remote點選及捲軸選擇Smart TV應用程式外，亦可配合語音辨識系統使用！仲有一款係為新Google TV而設，設有QWERTY鍵盤，方便輸入文字，而且有內置收音咪，可以好似Siri一樣用語音落指令。現場工作人員話認到廣東話同普通話等42種語言，不過即場就試唔到。

此外，LG亦擺出採用短投投影技術的Laser TV，透過DLP投影機，可以喺22吋距離下，投放出大至100吋的全高清畫面，不過論畫質就難跟OLED TV和Ultra HD TV相比。