巴黎隱形

法國巴黎在時裝界、藝術界均有極高的認受性，基本上每個愛時裝愛旅遊的人士都對法國巴黎充滿無限憧憬，特別是寒冬之下夜幕低垂襯上一街燦爛燈飾，確實叫遊人如同走進童話國度般，但此情此景可能好快就會成絕響，因為近年財困不斷的法國，早前向富豪徵收重稅就已搞到富豪移民潮，近日能源部長又宣布全國公共建築、辦公室及商舖，須在凌晨1時至7時關燈，意味巴黎鐵塔、凱旋門及香榭麗舍大道從此會在夜間「隱形」，深受光害影響的香港市民可能會為此措施拍爛手掌，但對每年有超過8,000萬旅客到訪的巴黎旅遊業來講，這可能會是一個「催命符」，如果他日凌晨後無靚景睇，搞到無遊客去掃Hermès、Chanel、Louis Vuitton，拖累名店要炒人推高本身已高達10.3%的失業率，都咪話唔令人頭痛！

Pasu Reporter

自製Poster

自從智能手機嘅出現，的確改變了全世界的生活模式，足不出戶，按幾下鍵盤，玩遊戲、與好友Chat Room聊天、買電影門票，乜都得。而我，就喜歡它擁有拍攝功能，再加上推陳出新的App，即使是電腦白癡如我，輕輕鬆鬆幾分鐘就可為原來的相片整色整水，調校色調，及揀選心水相框。早排瀏覽Apps Store時，發現了這個「Phoster」應用程式可製作個人海報，仲要免費喎，即時下載來玩吓啦。試玩後，覺得效果不錯，便推介同事M下載。可惜，這個App免費期限已過，現在需付上15港元才可以玩了。

Candy Reporter

價值兩餐晏的美肌飲料

作為美容記者，經常收到不同產品的試用裝，不過臉就得一張，未必試得晒。所以小記覺得食得落肚的美肌食品和飲料就最實際，因為可即時同人分享，齊齊品評。最近就試飲過肌之子麥子肌植物胎座美肌飲料，標榜用植物胎座取代動物胎盤，同時具有抗老回春功效。小記第一時間試飲，味道帶有小麥味，比起很多大牌子的膠味好好多，之後望一望價錢，嘩！係飲咁多次美肌飲料以嚟最貴！平均$79一支，唔排除Keep住飲係有效果，但呢個價錢食到兩餐晏仔喇喂！你話女人為咗靚係咪一定多多錢都肯畀呢？Sorry，我應該係例外！

Moe Reporter

DIY窩釘皮鞋

小記一向喜歡窩釘，奈何質素較高的窩釘單品往往開天索價，像一對Christian Louboutin皮鞋就至少要幾千蚊，小記真係無力應付。殊不知有日行過H&M，見到一對麖皮皮鞋只需199大元，心想不如去深水埗買窩釘，自己加工扮「正貨」，着爛亦不會心痛。奈何本人實在太懶，鞋買回來後就丟在一旁封塵。難得友人J自告奮勇，幫忙買窩釘之餘，還花了一整晚時間縫上窩釘，十隻手指頭畀針拮到紅晒，在此向他致以萬二分感謝！

Keith Reporter