飛鏢狂熱 3層大場食飲掟

近年飛鏢機在香港大行其道，無論是Dartslive或PhoenixDart都各有捧場客，單以Dartslive鏢機計，就有超過200間不同酒吧、道場有提供。不過一般酒吧因環境所限，擺放鏢機數量不多，但純飛鏢道場因為多青少年幫襯，大多不設售賣酒精類飲品，想搵個既方便掟鏢，又可以同三五知己豪情暢飲的好地方都唔容易，今日小記就有好介紹！

位於旺角豪華戲院旁的廣建中心，當中5至7樓是Super Darts Unit的「主場」，每層佔地2,000多平方呎，5樓為卡拉OK廂房，6樓則為酒吧區，而7樓則是飛鏢道場，放置了多部由日本引入的「Dartslive2」軟鏢機（簡稱D2機），更兼售各式專業飛鏢用品。

黑白主題 裝修簡約

其中位於6樓的Ace Darts Bar，全場落地玻璃、景觀開揚，更以簡約設計為主題：黑色牆身、黑皮梳化，配上白色吧枱及兩部用來播放過往世界軟鏢賽的大電視，連射燈都唔多盞；吧內擺放了5部軟鏢機，適合三五知己一邊飲酒、一邊掟鏢。負責人嘉明解釋，此舉全因體恤鏢友掟鏢時需要高度集中，所以於裝修上捨棄一般酒吧的霓虹Feel，改以簡約的黑白設計為主調。而調酒師細傑更表示，鏢機後面放了一排大梳化，方便其他客人觀戰，對於不少喜愛Show Off的客人來說，正好給他們機會大展身手。

若然想和一眾鏢友搞派對，則可落5樓，內裏除設有一個小型酒吧外，更有4間可容納15人以上的派對房，裝修簡約，同樣擁有落地大玻璃，景觀不錯。而最特別是天花的「啤牌燈」，印上Ace字樣，賣廣告之餘同時不失潮味。如人數眾多，更歡迎包場！

地方闊落 鏢機充足

至於7樓的「道場」，則提供前後兩排共12部「D2機」，當中最吸引鏢友之處，自然是地方闊落，因為坊間一般所謂的「道場」，多數只能容納7至8部軟鏢機，入場後隨時要「跟機」，相反這裏鏢機充足，亦不會有職員在旁指指點點趕客，令鏢友感覺極Free。更有熟客細細聲對記者表示：「玩熟咗，有時唔入錢開Game都可以掟吓練手勢。」

另外據職員表示，由於Super Darts Unit地方夠大、鏢機又多，所以經常會舉辦不同類型的軟鏢比賽，加上佢哋兼售各式專業飛鏢用品，係鏢友練習同交流鏢技嘅好地方。

Dartslive2 Mini Game搶客

D2機係目前亞洲最多人玩嘅軟鏢機之一，Function夠晒多。只需買張個人「Save卡」，就可輸入玩家資料，每次開局前插入D2機內即可顯示閣下掟鏢等級、過往紀錄等，係每位鏢友嘅身份象徵。更設有官方App，方便iPhone及Android手機用家隨時查閱，而D2機更內置多款「小遊戲」，掟悶咗，可隨機開個Game玩，難怪近年吸引不少女士加入掟鏢一族，皆因唔識掟都啱玩！

掟鏢冷知識

掟鏢時經常都聽到人講各式飛鏢術語，想唔想知道點解呢？

Double In：必須掟中雙倍區先開始計分

Open In：掟中任何區域都可開始計分

Master Out：須掟中三倍區才可結束比賽

3 in a Bed：3支鏢掟中同一個雙倍/三倍分

Low Ton：掟出100-149分

High Ton：掟出150-177分

Hat Trick：3支鏢全中Bull

打邊爐：掟Bull時3支鏢都掟晒喺紅心周圍

三一萬能俠：3支鏢掟中晒1分位置

Shop Info

Ace Darts Bar

地址：旺角廣東道1125-1127號廣建中心5-6樓

電話：2381 6887