影月回歸！Figure最佳組合團圓

所謂有黑暗就有光明，有日食就有月食，因此玩「拉打」若然有Black但冇影月，就始終說不過去。不過，偏偏12吋Black入屋多年，小記卻因價錢問題，遲遲沒有為佢搵番個伴。直至早前聖誕節，格晒價後終購入「Medicom RAH 影月ver 1.5」，一圓多年心願。

拆開包裝，撇除皺紋衫、靈活度不高等傳統老問題外，Medicom出品的「拉打」着實靚到無話可說，不但身形比例準確自然，撒旦劍與劍鞘造工更細緻到爆！獨立Display未算好靚，但拍埋Black身邊卻能互相輝映。任憑你Hot Toys蝙蝠俠與小丑有幾夾，Figure界最佳組合始終係佢兩兄弟！

Gilbert Reporter

我的最愛

我愛音樂，聽歌係人生一大樂事，尤其是在交通工具上，戴上耳筒，便不再聽到別人的無謂對話；你的世界，我沒興趣。因此，N年前Apple iPod面世，對我而言就是宇宙最偉大的發明，一個盒仔可以裝幾千首歌，正到出汁。2003年買了部被譽為史上最靚聲的iPod三代；2005年買了部30GB的Video iPod。服役多年後，電池老了，機身花了，容量也打爆了，結果最近買了部160GB接力，不用二千元，如無意外應可聽足十年八載。

Tony Editor

冬日暖笠笠

想喺寒冷天氣之下都保持個身暖笠笠，除咗買件靚靚羽絨之外，最好當然係食番碗暖身嘅蛇羹。上星期去咗大埔墟蛇王「乜」，其實十年前都幫襯過，久別重逢，質素依然有水準，至於套餐只係貴過當年幾蚊雞，埋單四十幾蚊而已！相比近十年加幅有成300%嘅連鎖食店，佢都算係有良心了！

Michael Reporter

1TB藏相

唔經唔覺，家中電腦的500GB HDD就快爆滿。爆滿的原因唔係放太多電影或者太多歌曲，而係實在太多相片之故。迫於無奈惟有買個WD 1TB外置HDD以解燃眉之急，希望可以撐到一年半載。重點係個外置HDD支援USB 3.0，過資料好似風咁快，換着仲係USB 2.0的話，冇一晚都唔使旨意過晒500GB相。有影相的都知道，要打爆500GB容量其實好容易，喪影RAW檔案就成事，不過小記都係鍾意影JPEG多啲，一來原汁原味無修飾、二來慳位，影得唔好都只能怪自己技術差。

Jason Reporter

群星拱照小學雞

早前放假無節目，去了影碟舖揀戲睇，熱門商業片睇得膩膩哋，就揀了韋斯安德遜的《小學雞私奔記》。睇過他之前的《癲才家族》及《大吉利是有限公司》，都是怪雞得來又過癮的電影，新作《小學雞私奔記》亦繼承了一貫風格，主角係兩位小朋友，一見鍾情決定私奔，家人、警察及社工的反應就夠晒幽默抵死，更難得是導演夠牙力邀請了多位荷里活巨星客串，包括布斯韋利士、愛德華諾頓、標梅利等等，可說是群星拱照小學雞。

Angus Reporter