Make It Count to ' M ' please!

我承認自己做運動做上癮，做少一兩日運動就周身唔聚財。平時一星期Yoga、Bodycombat同Zumba都玩齊，夏天仲會去埋游水，到咗冬天天氣涼番就即刻去跑步。咁啱呢排Nike搞咗個「MvsW狂奔派鬥—THE FACEOFF」跑步活動，仲要搵埋我至愛林海峰做代言人，我當然更加起勁出腳支持，順便可以做善事幫香港遊樂場協會籌款，支持青年體育培訓。雖然隔咗成個夏天冇乜點跑，但可能呢幾個月開始跳Zumba不停用腳又跑又跳，跑步成績突飛猛進，頭一次跑步一口氣跑咗10km，時間仲要係46:02，Average Speed 4'35"/km。我自己都嚇咗一跳，喜出望外！可惜我係女性，成績只會計落W女派入面，呢個情況下我真係好想轉「性」，將成績計落M男派入面（雖然我呢啲成績只係微不足道），但為咗支持阿Jan，Make it Count to 'M' Please!!!!!!!!!!!!!

Sanna Reporter

大愛迷你掃具

小記雖是美容記者，閒時也會略施脂粉，無論上眼影、遮瑕都貪快同方便，統統用手上。直到前陣子負責一個美容工具Feature時，勾起我購入掃具的念頭，但款式花多眼亂，總是拿不定主意，不是嫌掃毛不夠柔軟，就是嫌掃柄太長，不能放進化妝袋。上天恍似聽到我的呼喚，在聖誕前收到一套旅行裝迷你掃具，有齊胭脂掃、遮瑕掃、眼影掃、 眼影暈染掃及眼線掃，Size細細完全合我心意。加上選取山羊毛和黑松鼠毛所做，一點都不刮面，真係舒服到不得了！

Yilam Reporter

貼番夠本

曾經佗過B，所以深深體會佗仔期間忍受樣樣都要「戒」所帶來的痛苦；戒口都算，因為我唔算為食，但戒扮靚，例如為十指填下顏色都要戒，真係有違我的個人及職業操守！試過忍唔住買咗指甲貼紙來玩，發覺好方便而且唔怕有害。眼見L'Oreal新出立體藝術美甲貼紙，就忍唔住Share一下。今次一次過出咗8款，深淺閃的顏色都有，就連我最愛的波點同格仔都俱備，貼完又唔使等乾，轉款容易，更方便襯埋全身服飾，超級User Friendly！

Kiki Reporter

鬼怪唉瘋Case

同事糖果小姐係「唉瘋」的忠實擁躉，所以最近換咗部5仔，不過，佢又嫌機款太新，無咩機套好揀，好彩佢識到我，對啲古靈精怪的飾物配件都略有研究，所以我就推介佢幾款好搞鬼既Case。好似專出創意造型手機套品牌Candies，最近有幾款好似「手指指」、「懷舊收音機」同埋「笑口噬噬」機套都幾搞嘢，好可惜我唔係「唉」系信徒，所以用唔着。糖果小姐見到鬼咁歡喜，不過佢突然面色一轉，話唔知邊款易襯衫，所以都係要慢慢諗下喎。

Amy Editor

終於轉運啦！

近日終於有運行啦！話說前陣子Kiehl's嚟公司宣傳一個慈善計劃，由紐約著名流行藝術家Kenny Scharf為Kiehl's的節目限量版作包裝設計，Kiehl's將會捐出約160萬港元予全球多個慈善機構。當日除有真人扮演Kenny Scharf創作的卡通人物「Squirt」與記者合照外，小記更非常幸運地抽中限量版的模型，這件Figure全球只有2,000隻，每一隻更有獨立編號及證書，可算是非常珍貴！秋冬天氣乾燥，大家在選購潤膚產品時，不妨支持吓呢個合作計劃，既可買到心水產品又可以幫到世界各地的貧困兒童，一舉兩得呀！

Alex Reporter