on.cc 東方互動主頁

假日遊最Fit Volkswagen Sharan

對香港人嚟講，養車屬高消費項目，尤其是已有家室嘅車主一族，部車快唔快、型唔型都係其次，最緊要車價平、耗油少，車廂實用，足以應付一家大細所需，總之一字記之曰：抵！Volkswagen Sharan就符合晒以上要求，淨係計2.0 TSI引擎嘅「食量」可以低至8.4L/100km，已經令人雙眼發亮。

七人車唔再只得日系型號，近年唔少歐洲品牌對呢個市場都積極咗，市場反應亦都好受落，可能出於歐洲車嘅號召力，出名「鋼水」好、底盤夠紮實，就算以較高速入彎，傾側度都非常低，感覺分外安全。就以今次測試Sharan為例，從九龍灣沿大老山隧道至車公廟道，前往沙田下城門水塘水壩，沿途經過柏油路，穩定之餘，車廂全程都保持寧靜，可見做足隔音工夫。

底盤紮實攻彎穩

之後進入下城門水塘一帶嘅山路，當地出名彎多路窄，當時車速保持喺50km/h之內下，車身只有好輕微嘅傾側，見出底盤功架之餘，懸掛系統維持舒適嘅乘坐感受外，亦應付到動感駕駛嘅需要，彎再多，乘客或駕駛者都依然感到愜意。更令筆者驚喜嘅地方，係A柱設計夠細心，冇盲位之餘，仲加埋三角窗，亦有助拉闊駕駛者嘅視野，主動提升行車安全。

User Friendly車廂布局

以往日系七人車能夠KO歐洲對手，重要原因係車廂設計靈活、實用得多，Sharan就成功從後趕上，車廂採用2+3+2嘅座位布局，前排空間十足，又有大天窗、天幕組合，透光度大增；中排採用獨立設計，清晰劃分個人空間，而且前後移動幅度相當大，方便不同高度嘅人士作出調校外，後排乘客進出亦都變易咗，加上前排椅背備有小餐桌，專為中排乘客而設；後排勝在空間寬敞，絕非傳統七人車嘅Dog Seat水平，貼近四門房車級數，加埋兩側都用咗電趟門，更加出入方便。至於耗油表現，2.0公升直四TSI引擎嘅綜合耗油量只係8.4L/100km，按目前油價計算，即係$1.4/km左右，而且車價相宜，進一步與日系對手拉成均勢。

遊沙田充電

無論係家庭用家或者拖友，既然揸得七人車，唔去郊遊一番，實在暴殄天物。今次我哋就同模特兒去咗沙田區多個景點，包括年月悠長、依家已經係一級歷史建築物嘅曾大屋，係由曾氏家族於1848至1867年間興建，佔地6,000多平方呎，四角築有碉堡，堡內又有槍孔及瞭望台。至於城門河亦係休閒熱點，假日有唔少人專程嚟到踩單車或散步，而且喺源禾路近沙田消防局一帶，有接近50個咪錶位，泊車都算方便。想感受多啲綠色氣息，大可選擇九肚山馬鈴徑公園，係散步、歇息、呼吸清新空氣嘅好地方。