Revoltech《漂流武士》動感Ichiban

日本漫畫家平野耕太嘅畫風一向瘋狂熱血，筆下角色位位都浮誇突出，每次睇佢嘅作品，都搞到腎上腺素飆升。佢嘅最新連載作品《漂流武士》中，主角島津豐久就被「山口式」炮製成可動Figure，將原著嘅豪邁戰鬥風格生動呈現，斬擊、跳射等動作都做得到，配合眼球可動Gimmick，以及現時有關商品未算多，作為粉絲毋須再三考慮，一於扑錘入貨！

可動眼球加倍傳神

根據原著漫畫劇情，島津豐久原本喺關原之戰，為咗保護撤退嘅兄長們，迎戰前來追擊嘅德川軍井伊直政，激戰過後無端捲入時空亂流成為「漂流者」，並且遇上其他歷史人物「廢棄物」，展開連場亂鬥。今次山口式雖然未有製成故事中身受重傷嘅「戰損版」，但都貫徹原著嘅瘋狂本色，尤其是喺眼神落工夫，相比平時嘅換面玩法，今次就只有「閉口正經Look」跟「露齒瘋狂Look」兩款，但眼球獨立可動，分外好玩，從此擺甫士唔使再用動作遷就表情，而係表情配合動作，自然傳神得多。

下盤關節可動性高

島津豐久係一個時刻散發動感嘅跳跳紮角色，齋睇一身紅色戰衣，而忽略咗胸前及背後嘅家紋，分分鐘認錯為「日本第一兵」嘅真田幸村。Figure為咗營造動態，特別將腰前嘅可動布帶，製作揚起狀態，配合兩側嘅活動裙甲，輕易做到彈跳效果。此外，髖關節位置略為前移，曲腳時重心看似前傾，可以做出更誇張嘅跳躍動作。武器方面，腰背掛咗兩把唔同大小嘅「野太刀」，當中嘅長刀可以拔出，安裝喺右手上，就可擺到唔同形態嘅拔刀劍術，另有一柄「短筒」手槍作輔助射擊，可惜短刀連劍鞘只係裝飾物，拔不出來，可玩性難免扣分。

Iron Man Mark VII上架在望

繼Hasbro和Hot Toys之外，海洋堂都算係最積極推出Iron Man Figure嘅廠商，旗下嘅山口式Revoltech已經出過Mark II、III、IV、V、VI等多個版本，至於喺《The Avengers》登場嘅Mark VII，亦將於明年初有售，定價¥3,800。唔知廠方會唔會出埋Mark I，好讓一眾Iron Man大團圓呢？

查詢：2148 9483（精品）