最後晚餐 V.S. 末日派對

各位，讀到此文，證明2012.12.21的末日傳說大家都已安然度過。對於全球面對所謂末日，心態各異，有人儲定幾日糧餉，亦有人處之泰然，不過同事M為迎接末日來臨，建議大家做點事來紀念吓呢個時刻，結果佢提出以達文西的名畫《最後的晚餐》（Last Supper）為藍本，湊齊潮流組組員，拍咗以下呢幅命名為《末日派對 潮流不死》作為紀念，當初構思本是充滿聖誕氣氛，但點知出來的效果卻似新戲開鏡拜神儀式，Anyway大家旨在高興吓。但最可惜因工作關係，「糖果小姐」當日缺席。唔緊要！科技發達，經同事A及E的「惡搞」技術，除了將糖果小姐執埋入去，成Team人齊齊整整，更帶一眾組員回到過去。

大家捱過咗所謂末日，好快又到2013年，曾經諗過末日前一定要做嘅事，就好去實踐啦，因為，末日真正來臨之時，我相信唔會有人通知你。祝各位新一年懂得如何好好過日子！

Amy Editor

賀年福罐

過完聖誕，好快又到農曆新年，又要諗定拜年賀禮。身邊大多是80後講究Chic Style的Couple，禮物當然不能送生果朱古力咁老套。小記今年就睇中咗無印良品的福罐。福罐內包含了一個隨機抽樣、由日本關東及北海道等工匠製成的手工吉祥物，還有印有吉祥物圖案的棉質手帕和介紹吉祥物的小冊子，全數共30款，每款都有不同意思，新年送禮唔再只係飲飲食食，送呢個滿載福氣又有意義的福罐仲有心思，購物滿$300加$100就可以換購了。

Moe Reporter

自家杯麵

有冇無諗過平日食開的杯麵，可以由自己揀選配料及調配味道，仲可以親手設計杯身呢？這個DIY工作坊一直都存在，但可惜在遙遠的大阪，未有機會炮製Candy味道的杯麵。直到上星期，好友來電通知，工作坊靜悄悄由大阪搬到香港某商埸，只要付出$20，便有機會設計獨家杯麵。整個過程由繪圖到包裝，花了約大半個小時，終於大功告成。可惜呢個活動已經完結，想整？就要飛去大阪了。

Candy Reporter

冬入春裝

朋友們聽見小弟話買鞋，反應有二，向來有「買鞋癮」鼓吹消費嘅朋友A搶住話「啱o架，鞋就最襟着，又成日有新款，買多兩對都無所謂。」先不論「襟着」同「新款」有否存在對立，但獲好友支持，罪惡感已立刻大減，此時近年已收手唔買「反消費」嘅朋友B就以盤問語氣話「又買鞋，你有幾多對腳啊？」未及回答他已再追問「咩鞋？」我答「涼鞋」，佢再不以為然回應「乜你咁正，夏天買Boots冬天買涼鞋」，其實將事情套入「冬入春裝」嘅時裝哲理是並無不妥的，而且更重要的係鬼叫依家買有七折咩！

Pasu Reporter