Volkswagen Beetle 1.2 TSI浪漫山頂遊

想同愛侶過浪漫Boxing Day，又唔想畀食肆「劏」，不如上山頂遊車河，順便沿盧吉道及夏力道環迴山頂行一圈，欣賞日落美景及維港兩岸璀璨燈飾，以居高臨下嘅角度觀賞聖誕燈飾；有時間仲可以行凌霄閣，甚至去蠟像館同「奧巴馬」、「柯德莉夏萍」影張合照，總好過喺尖東、銅鑼灣逼餐懵啦！

山頂廣場及凌霄閣集購物、飲食、娛樂於一身，係著名嘅旅遊景點，當地食肆林立，由高級餐廳、咖啡茶座以至連鎖快餐店都有，豐儉由人，幾廿蚊一樣食得飽。而且山頂廣場一帶設有室內停車場及咪錶車位，泊好車後行兩、三分鐘就係步行徑入口，非常易搵。環迴山頂走一圈，可以飽覽港島南北兩岸景色。如果想遠眺九龍半島、青馬大橋，可以改去龍翔道觀景台及青嶼幹線觀景台，兩個地方都設有停車場，唔使擔心接「牛肉乾」，可以專心Set好腳架慢慢度位，影番幀沙龍。

應節拉花人見人愛

今次嘅「伴遊」係Volkswagwn Beetle特別版，車身拉花非常應節，頭冚同車尾都貼咗「Merry Christmas」字樣，車門、車頂就分別有鹿車及聖誕樹點綴，試車途中泊喺中環大會堂對開空地取景，就引嚟唔少途人都要求合照，小甲蟲即時變成大明星。呢部「聖誕甲蟲」屬於1.2 TSI版本，除咗車身拉花，其餘部分都與標準版相同；今代Beetle嘅車身體積比上一代大咗，車身長、闊度分別有4,278及1,808mm，各自多咗152mm及84mm，車頂亦唔再係傳統嘅弧形設計，配合更大、更闊嘅輪拱，一副運動Look。

低扭充沛上斜好力

Beetle 1.2 TSI嘅引擎廣泛採用鎂合金製成，馬力105ps，並且喺1,550至4,100rpm期間，峰值扭力17.8kgm已經全數到位，加上車重只有1,297kg，今趟載咗筆者、攝影師及兩位Model，滿載之下由中環沿馬己仙峽道、山頂道往山頂上斜都好氣好力。此外，新甲蟲用咗七前速DSG雙離合器波箱，唔只轉波快，程式亦非常聰明，落斜時只要輕踩迫力，就會自動拖低一至兩個檔位，利用引擎制動嘅原理減慢車速，減少制動系統負荷，難怪廠方公布綜合耗油量只有5.9L/100km，就連二氧化碳排放量亦低至137g/km。

周全隨車設備

由於車身大咗，乘坐空間亦變得寬敞，尤其是後座唔只有充裕嘅Legroom，加上車頂由圓變平嘅關係，唔似上一代咁易頂頭，高佬一族唔使再專揀前排嚟坐。車廂布局依然時尚化，手套箱、門邊飾板等部分都與車身同色，感覺簡潔一致。

即使新甲蟲唔係大型車款，不過安全水平相當高，除咗車身抗扭剛性高達26,000Nm/°，跟車仲有電子穩定系統（ESP）、四安全氣袋等，況且廠方已將Bi-Xenon頭燈、Panoramic玻璃天幕、雙區域恒溫冷氣等列為標準配置，故此車價只係$269,800，吸引力之高顯而易見。

SPEC

車 型：三門四座位揭背車

引 擎：TSI

容 積：1,197c.c.

最　大　馬　力：105ps/5,000rpm

最　大　扭　力：17.8kgm/1,550-4,100rpm

驅 動：前置引擎、前輪驅動

傳 動：七前速DSG

車　身　體　積：4,278×1,808×1,486mm（長×闊×高）

0-100km/h：10.9秒

綜合耗油量：5.9L/100km

查 詢：3698 9688（Volkswagen HK）

自製環保精品

「甲蟲」Beetle在全球有唔少忠心粉絲，外國就有車迷布置家中聖誕樹時，諗到廢物利用呢招，將汽水罐先裁剪、再覆摺成一部古典Beetle嘅模樣，賣相獨特又鬼馬。此舉既可一Show自己對Beetle嘅忠心耿耿，又可布置聖誕樹及達到環保要求，絕對係一舉三得，抵讚！唔知下年過聖誕，廠方會否邀請呢位仁兄合作出精品呢？

變身流動聖誕樹

聖誕樹掛燈飾就見得多，掛喺Beetle身上你又見過未？外國就有燈飾製作公司，專登搵咗一部已經買少見少嘅舊款開篷Beetle，將多組由設計師精心設計嘅燈飾掛喺車上，遍及頭、尾泵把、頭冚、輪拱及裙腳等位置，令呢部Beelte喺暗黑環境下都顯得Sharp醒過人，遠睇就似一棵流動聖誕樹，揸出街肯定型到爆燈！

酒後切勿駕駛！

聖誕節唔少人都會飲番兩杯慶祝，不過揸車嘅話就千祈唔好犯戒，喺2010年生效嘅《2010年道路交通（修訂）條例》，大幅增加酒後駕駛及其他嚴重交通罪行嘅罰則，包括引入三級遞進刑罰制度，酒精比例超標愈多，停牌期愈長，酒後駕駛初犯者增加至六個月至兩年不等，重犯者停牌期為二至五年。酒後駕駛，害己害人，開車前咪飲！