發條綠

早前去了美國Google總壇採訪，那裏有各式各樣Google精品，包括好多同事都讚靚嘅Tee，件件Tee都用Google各樣服務Logo作圖案，都幾過癮。不過我一件都冇買，淨係買咗個Android標誌綠色機械人仔，佢得意在一上發條就曉自己行，仲要嘎嘎作響，非常Lo-Fi！其實小記枱頭有好多隻不同尺寸嘅Android人仔，可惜早年時常用來做相片道具，見報率太高，於是被下令雪藏不可再出鏡！因此今次係千載難逢嘅機會，畀Android人仔再一次登報！

Vincent Reporter

你做初一、我做十五

我家女兒係飲呢隻新西蘭奶粉，佢有時賣百幾、有時賣二百幾，視乎有冇畀人搶、托高個價囉！不過你有錢都冇用，我試過走勻港九，半罐都冇，嗰刻真係既火滾又徬徨！有日老婆去買奶粉，藥房告之，冇咩貨剩；好！你班人做初一、我做十五，第二日我WhatsApp太太：「今晚放工我出旺角掃奶粉，有幾多買幾多！」點知卻有此回覆：「你外母經已買咗十罐喇。」

後話：總有花生友馬後炮風涼說，買唔到奶粉係你嘅問題，呢啲係自由市場經濟；又或者話，餵人奶囉！

我答：OK！我祝你結到婚生到BB，老婆唔使返工又奶水充足，仲大把錢同精神一箱箱咁買，兼有間大屋擺奶粉！

Tony Editor