Qashqai+2過黃金聖誕

聖誕快到，商場肯定多人到爆，唔想同人逼、又唔想嘥咗個周末，我就建議去屯門黃金海岸逛逛，屆時除咗有街頭文化藝術表演，仲有一連串「聖誕藝坊」活動，由明日起一連四日，就有樂團、魔術、舞蹈等表演，睇完Show仲可以漫步泳灘，順便沿青山公路到咖啡灣BBQ，輕鬆Hea番日。

黃金海岸位於青山灣畔，歐陸式建築充滿地中海風情，唔少市民都鍾意喺度影沙龍或結婚相。由九龍揸車前往黃金海岸非常簡單，只要喺屯門公路（西行）選22號出口，接上青山公路後，就有清晰路牌指示。適逢聖誕月，黃金海岸有一連串「聖誕藝坊」活動，包括明日下晝兩點半至晚上七點，就有「聖誕樂韻悠揚」、「魔幻極速換裝」及「樂隊演唱」等節目，到場人士仲有機會參加聖誕手偶工作坊，共享親子樂。

七座車廂吞吐量大

今次專誠揀咗日產（Nissan）Qashqai+2做拍檔，原因有二，其一Qashqai+2係一款糅合Hatchback與SUV精髓嘅Compact Crossover車款，具備靈活操控及高性能等特點；其二係七座位車廂布局，一次過載晒模特兒、攝影師都仲有位剩，唔使出動兩部車，兼有大把位放行李。Qashqai+2嘅車長係4,541mm，比五座版多咗211mm，座椅就採用2+3+2布局，收起中、後排，就有1,520L置物空間，大到爬山單車都放得落，而且又有全景觀天幕及加厚座椅，坐長途車依然好Feel。

AUTO達致雙贏

至於性能方面，就由2.0L直四與Advanced XTRONIC CVT M-6波箱合組，馬力、扭力分別去到140ps/6,000rpm及20kgm/4,800rpm，輸出線性而流暢，配合高性能德國「SACHS」吸震筒，行車表現相當出色。而且有別於五座版，出車已經預載埋All-mode 4×4驅動系統，備有「2WD」、「AUTO」及「LOCK」等三種模式選擇，就以最常用嘅AUTO為例，主要以前輪驅動，若然車輪打滑，先會將適當動力分配到後輪，濕路行車都有上佳穩定性，又可避免不必要扯高耗油量。目前代理已將車頂行李架、Keyless Go無匙系統、藍芽音響及17吋輪圈列為標準配置，車價$269,800，屬於划算水平。

SPEC

車型：五門七座位多用途車

引擎：直四

容積：1,997c.c.

最大馬力：140ps/6,000rpm

最大扭力：20.0kgm/4,800rpm

傳動：Advanced XTRONIC CVT M-6

驅動：前置引擎、四輪驅動

懸掛：（前）麥花臣 （後）多連桿

車身體積：4,541×1,783×1,646mm （長×闊×高）

售價：$269,800

查詢：2803 5333（合誠汽車）