去熊貓執到寶

剛過去的12年12月12日，除咗係不少人結婚嘅好意頭日子，亦是不少玩具迷期待之日。事關平時甚少逛嘅荃灣熊貓酒店，地庫竟然開咗間奇趣天地，仲要揀正此日開張試業！作為Hobby界一分子，筆者當然要「視察」環境啦。去到即被佢過萬呎店面嚇親，仲要直至本月26日前，全場85折！結果筆者未行夠一圈，已執到正貨，就係日版魂Spec嘅宇宙騎士連碧加斯套裝。呢套玩具簡直係童年回憶，記得卡通片中主角D-Boy每次變身都要大叫「碧加斯」，跟手架機會陰沉應佢一聲「知道」，然後D-Boy先至可以「捐」入去變身做Blade。依家一千零一盒靚盒，仲要折咗唔使六舊水有交易，唔使諗，即刻扑錘買啦！

Alfred Reporter

另類搞笑MIB

返工已經夠辛苦，放工回家煲碟，如果還要睇一些口水多過茶、說教大過天的電影，不如上床瞓個靚覺好過。所以今次行影碟舖，就揀了這隻擺明輕鬆搞笑的《喪爆看更團》，單是名片就已經夠醒神，香港電影發行商為荷里活片改中文名時，最喜歡玩似曾相識的聯想，見之前有套《醉爆伴郎團》收得，就不理兩片台前幕後其實無一處共通，便硬將《The Watch》加個「爆」字。至於套戲有幾喪爆？四個麻甩佬無所事事走去巡邏社區，結果發現外星人侵略地球，搞到小記以為睇緊新一套MIB。

Angus Reporter

歎正宗「狗不理」

早前小記去了北京公幹，雖然工作緊要，但都不能不吃飽肚子，所以買了地道正宗的「狗不理」包子醫肚。點解要叫「狗不理」呢？一於Google溯源一番；原來以前有個整包嘅人名叫狗子，佢做包時非常專心，有人叫佢都充耳不聞，因而得名。不過網上有句「包子外表如同一朵綻放的菊花」，小記又唔係太覺囉。

Michael Michael

低調得來有格調

以前我好喜愛某「N」字頭的體育品牌，但自從有次佢贊助某君「古靈精怪」地跑馬拉松之後，我便很反感，永不購買之餘，更將家中的「N」記出品捐得就捐、送得就送。近排我愛上另一個「N」記，新歡低調得來有格調，美製及英製版本雖然係貴，但係手工精緻，以我價值觀來說，是物有所值的。溫馨提示，「N」記專門店美英版本定價超高，水貨平啲，去美國買最平！香港賣$1,900的，美國只賣一千頭！真係應晒老香港有句歇後語：「新澤西」。

Tony Editor

黑Tee「Causeway Bay」

唔經唔覺已經儲到第三件香港Apple Retail Store開幕日派發的限量紀念Tee。基本上每件紀念Tee都係一式一樣，只係心口Logo寫上每個分店所處的地區。好似上星期六開幕、三層樓高嘅Hysan Place分店就印上「Causeway Bay」字樣。不過上次Festival Walk同今次Hysan Place都係派黑色，失望！唔知下次有冇機會玩新花款呢？派紀念Tee呢招喺內地一樣有，通常做法都係黑底再寫中文地區名字，但當中最特別要數早幾個月上海南京東路店開幕時所派的灰底紀念Tee，上面用直行彩色中文印上「儂好，南京東路」，收藏價值當然更高！講番銅鑼灣新店，招牌式旋轉樓梯就冇喇，但兩道直樓梯經特別採光設計，上樓時有如行上天梯，工作人員話係每間店有唔同特色喎，果粉不妨去參觀下啦！

Brian Reporter