聖誕攝技下集 商場裝飾續拍

天寒地凍唔想出街影相食風的話,轉戰商場都一樣可以感受節日氣氛。近日觀塘apm和大埔超級城,特別布置了大型的聖誕裝飾,而且各有主題,繽紛可愛,影相真係幾靚架!

apm×tokidoki 注意白平衡

今次apm以人氣角色tokidoki為主題,打造一系列聖誕皇室兵團,一眾貓貓狗狗會穿上中古世紀的裝束同大家見面。究竟場內有乜拍攝熱點?首選一定係中央位置的幻彩旋轉木馬,由九組唔同造型的貴婦狗和精靈貓組成,仲要隻隻唔同顏色,而旋轉木馬頂部豎立了一棵高達60呎的超大型聖誕樹,鏡頭唔夠Wide都好難影得晒!旋轉木馬旁邊都有兩棵聖誕樹,上面仲有tokidoki的公仔擺設,方便大家同咁趣致的公仔合照。

想體驗做國王或王后的感覺,就一定要到皇室寶座留影,呢張12呎高的皇室寶座足夠兩個人坐,但拍攝時需要準確設定白平衡,才可以表現金色的質感和皇者氣派。場內仲有一部以獅子頭造型設計的「i-camera聖誕快拍陣」,畀你製作獨一無二的聖誕卡,只要對着鏡頭拍下你的大頭相,再選擇內置的聖誕皇室兵團圖案配襯,即可透過電郵或Facebook分享,非常互動。

假如大家對甜點無法抗拒,咁就要到上一層的甜甜圈Cafe觀摩一下,以Donut Girl為主題的甜甜圈Cafe,裏面擺滿各式各樣、相當逼真的蛋糕,即管使用微距拍攝模式盡情拍攝吧!

大埔超級城《聖誕糖果城》用大光圈

大埔超級城特別邀請了日本設計師縣口阿也,打造出 《聖誕糖果城》 ,以獨特的手繪畫風注入糖果元素。全場焦點當然係聳立在中央的棒棒糖聖誕樹,聖誕樹高14呎,仲插滿了色彩奪目的棒棒糖,頂部還有一顆大型糖果星星,要覆蓋整棵聖誕樹就要靠廣角鏡頭。場內又點少得可愛的主題人物,除了身高6呎的糖果妹,還有蛋糕小飛象和士的糖獅子與大家合照,以及利用糖果花卉作頭飾的巨型花仙子吉祥物,站在閃亮糖果花藝廊的兩旁,若果唔想背景雜亂,就要使用大光圈將背景虛化。

Jason