勁Game力谷玩轉AGS

一般打工仔只要放埋24號平安夜，聖誕長假由21號（星期五）晚已經開始！機迷們終於有時間煲番手頭上買落未玩嘅新Game，亦可以去埋亞洲遊戲展（AGS）打餐飽！往時AGS疊住聖誕假期舉行，不過今年12月21日就會揭幕，連玩四日玩到平安夜。今年必打嘅新Game就有2013年年頭先會推出嘅PS3 Game《God of War：Ascension》、《Metal Gear Rising Revengeance》同埋PSV四人連線對打「芒亨」式嘅《Soul Sacrifice》，唔少遊戲精品更在會場限定發售呢！

必打遊戲：《God of War：Ascension》私人影院殺神

必打遊戲之首，應該係SCE自家開發動作重頭戲《God of War：Ascension》，主角Kratos已幾乎成為PS自家的經典遊戲角色。同以往三集有啲唔同，今集唔止淨係用各式武器「處決」同「凌遲」對手，仲加入新生命再生動作，發動後會令周圍時間倒轉，令原本被破壞的碎片「重生」，好多時都要靠這些碎片成為踏腳石跳到指定區域。試玩版唔少得畀大家試盡Kratos的身手，相信最吸引都係可以操控Kratos騎上巨大頭目身上再處決佢，很想玩吧？話晒《God of War：Ascension》都係自家大作，所以AGS會場都有特別優待，提供埋Sony新一代頭戴式顯示器HMZ-T2畀大家試玩，可以享受3D私人空間慢慢打！

平台：PS3

推出日期：2013年3月

《Soul Sacrifice》人生交叉點

驟眼睇，PSV獨佔、以四人連線打怪嘅《Soul Sacrifice》都幾似「芒亨」，不過由名製作人稻船敬二主理，當然不甘心成為翻版「芒亨」吧！遊戲理念來自「救贖」同「犧牲」，無論係試玩版上打低小嘍囉時又好，又或者有同伴瀕死都好，都會面對人生交叉點，究竟救人抑或唔救好呢？如犧牲同伴後，可使出強大魔法打怪，玩時都預咗要犧牲自己成全團隊，比齋劈嘅遊戲多一層深度。畫面表現相當出色，而且操作系統都幾易上手，大家到時入AGS一試就會明白，尤其係「芒亨」迷，應會愛上呢款新遊戲。

平台：PS Vita

推出日期：2013年春

《Metal Gear Rising Revengeance》自校角度斬奪

此大作由Kojima Productions負責世界觀、故事同設定監修，並由Platinum Games開發，在今年TGS上曾大出風頭。它會承接《MGS 4》發展，不過主角就唔係蛇叔，而係型仔好多，並被改造成生化人嘅雷電，強調靠長刀「斬奪」。何謂「斬奪」？即係斬完再奪，先要用Analog掣控制雷電出刀，並調校角度將敵人斬成多塊，並奪取對方體內的能源。其中斬敵方法更一改以往只按功能鍵就會自動幫大家攻擊的做法，依家可控制直斬、橫斬或斜斬，只要練習多幾次就能操控自如！試玩版對手唔算強，幾下手勢就搞得掂。至於遊戲速度感同動作真實感都做得唔錯，仲可以使出Ninja Run實現忍者嘅飛簷走壁動作添！

平台：PS3

推出日期：2013年2月

《Lost Planet 3》轉用UE3引擎

Capcom名作《Lost Planet》系列都好幾年無新作推出，《Lost Planet 3》自然令好多機迷期待。不同於前兩集用上自家遊戲引擎玩第三身射擊，《Lost Planet 3》轉用主流的Unreal Engine 3遊戲引擎，成隻遊戲比較黑暗，唔似之前好多雪山場面，感覺比較似《Dead Space》，機迷是否受落就難說了！不過從試玩版上可見，動作流暢感、對極端環境的描繪以及異形生物造型都好抵讚，玩落都幾刺激，正式版可供多人對戰，值得一試。

平台：PS3

推出日期：2013年內

限量禮物攻略

AGS每年都有唔少限量遊戲精品發售，而且在場內消費買遊戲主機同遊戲都有限量禮物送，好似首名預訂「PS Vita《Soul Sacrifice》限量同捆裝」更可額外獲得製作人稻船敬二簽名同捆裝，買一得二，更係無價寶，趁聖誕節送畀自己當禮物都唔錯！

台灣美眉Cosplayer vs日本遊戲製作人

PlayStation今趟更首次請了兩位台灣人氣女Coser女帝林采緹及DenKa來港跟機迷見面。至於若想近距離接觸遊戲製作人都一樣有機會，除了近年常客《Tekken》系列原田勝弘跟《Final Fantasy》系列橋本真司跟北瀨佳範外，「男神級」稻船敬二亦會以《Soul Sacrifice》製作人身份到港，12月21日傍晚6時就會站台見機迷！至於首50名於PlayStation服務台登記參加《真．北斗無雙》製作人活動的朋友，更可得到全球限量50件簽名版「香港版─你已經死了─《真．北斗無雙》T恤」。

遊戲製作人登場時間

12月21日 4:15pm《Gundam Battle Online》桑原顯

12月21日 6:00pm《Soul Sacrifice》稻船敬二

12月22日 1:15pm《真．北斗無雙》鯉沼久史

12月22日 2:30pm《Final Fantasy》橋本真司、北瀨佳範

12月22日 5:15pm《Tekken Tag Tournament 2》原田勝弘

「亞洲遊戲展2012」小資料

日期：2012年12月21日至24日

地點：香港會議展覽中心5號館F及G廳（PlayStation展區：5A01）

時間：10:00am至8:00pm（12月24日至4:00pm）

入場費用：$28（一日門票）

網站：www.asiagameshow.com