BCAA酸？咩嚟o架？

早輪經過尖沙咀某上樓跑步專門店，見貨架有包反晒光嘅糖，原價$55，減價$45。店員介紹跑步前、跑步時、跑步後食一粒，就可以補充唔知乜乜物物。我其實唔明，但覺得應該係正嘢，買咗兩包。返屋企Google吓，原來BCAA即是支鏈氨基酸；運動時，身體熱量來自肝醣和脂肪，如運動至某一程度，就會分解蛋白質作為熱量來源，並會先分解骨骼肌肉蛋白。如果分解正在運動中嘅肌肉，就好容易令肌肉耐力不足而抽筋！補充BCAA，就可避免身體動用本身肌肉蛋白，理論上可以紓緩疲勞及延長耐力。係咪咁神奇？我淨係覺得橙味好醒神，含住一粒跑步，可以令初頭呼吸不致太急促，跑長距離又好似舒服啲；可能是心理作用吧！不過，運動比賽，心理因素往往係致勝關鍵囉！

Tony Editor

《Line Pop》認真你就輸鳥

香港好多人用嘅《WhatsApp》有消息話吸引到Facebook收購，不過我始終Buy《Line》多啲！尤其係出咗無幾耐嘅《Line Pop》，就真係叫人玩到廢寢忘餐，睇錶等夠40分鐘儲番五個心心又會開嚟玩！之不過點解啲朋友玩到八十幾萬分咁誇張，而小記玩極都係得廿幾萬分？真係好唔甘心！上YouTube仲有人Post玩到超過一百萬分，只見用三隻指頭在畫面上狂掃，不斷連Combo，見到啲分「嘭嘭」聲狂飆，睇到心花怒放。原來要喺《Line Pop》上拎高分，除咗手指要夠快之外，更要仔細思考每一步的策略，苦練咗半個鐘就可提升到四十幾萬分，終於可於躋身Friend List頭幾名，套用一句網絡名言「認真你就輸鳥」！

Brian Reporter

生存筆記

傳言12月某日係世界末日，不過日子仍然要過；就好似小記每日仍然要交稿一樣，所以一定要買嘢補償勞累心靈。早前趁住有上台優惠，就入手咗部Samsung Galaxy Note 2，貴為Note系列狂迷嘅小記，當然要影番張兩代同堂相啦！點解小記對呢個系列咁忠誠？只可以講，有時啲嘢用過，真係返唔到轉頭o架！

Michael Reporter

壞電視引發的智能叛變

睇開部電視無故壞機，一開機即時鬼影憧憧，不知情的還以為播緊3D電影。雖然未出雙糧，但都忍痛買了部3D電視。早幾日終於運抵家中，試機就當然要體驗3D效果，因此專程去了買隻藍光3D版《I, Robot智能叛變》。套戲幾年前入戲院睇過，講機械人發展出人工智能背叛人類，原來背後有大陰謀之類，劇情熟口熟面，N年前睇日本仔特攝片《大鐵人17號》都是類似那條大橋。講番部電視，能安坐家中睇3D電影確是過癮，但不要問我有冇用來睇《3D肉蒲團》，老夫唔想講大話……老夫……真係冇睇。

Angus Reporter

超暴力漫畫進入高潮

論畫功，《範馬刃牙》超核突。論劇情，佢除咗打交便空無一物。然而，就要因為佢內容夠癲，才能連載廿年依然有大量粉絲。最近漫畫第三部踏入完結篇，苦等廿載、萬眾期待的父子打交終於展開，範馬刃牙對範馬勇次郎，甚麼三角龍象形拳、人肉雙節棍全部出齊，小記一邊笑佢勁誇張，卻又一邊忍不住追看下去。但究竟兩父子打完後仲有無古講呢？早前連原始人都出埋，莫非下次打外星人？

Gilbert Reporter