on.cc 東方互動主頁

《無雙Orochi 2 Hyper》決戰Wii U

雖然KOEI食「無雙」老本都食咗十幾年，不過一年出兩、三集，改少少並用上唔同角色打「無雙」，粉絲們仍會乖乖進貢。跟日版Wii U主機幾日前齊齊推出的《無雙Orochi 2 Hyper》，其實係以PS3/Xbox 360版的《無雙Orochi 2》做藍本，但廠方聰明在加入兩個新角色「紅葉」同「神農」，再加埋結合卡片遊戲玩法的「決鬥模式」，叫做有啲新意！

追加「紅葉」及「神農」

《無雙Orochi》系列特色係玩時空交錯，即是《真．三國無雙》角色、《戰國無雙》角色、其他系列遊戲角色，甚至係原創角色都會共冶一爐，一齊打生打死。由於無歷史包袱，遊戲要加入新角色亦容易得多，唔似《真．三國無雙7》要加埋魯肅入去打咁尷尬。比起原版《無雙Orochi 2》，今次「Hyper版」追加兩個新角色，其一係《Ninja Gaiden》嘅女角「紅葉」，用上天龍薙刀同神樂弓兩款武器，始終性感女角都係比較受歡迎；至於另一個新角色係同伏羲、女媧齊名嘅原創角色「神農」，以赭鞭做武器，一出招就會激起草同樹葉，配合番「神農」形象。夾夾埋埋，遊戲登場角色超過130人，認真誇張。

鬥用卡片決戰

這系列遊戲向來以Tag Mode進行，可以揀定三名武將組成一個團隊，隨時切換。不過話晒係新版本遊戲，今集「Hyper版」就有個新「決鬥模式」，唔止明刀明槍互劈，仲加入卡片式玩法。在戰鬥入面可以發動四種唔同屬性卡片，包括以紅色代表嘅攻擊、綠色嘅輔助、藍色嘅妨礙同黃色嘅特殊卡片，不過就算屬性相同，效果都有高低。卡片左上方嘅數字係所需發動該功能的戰鬥點數（BP），而戰鬥點數會因時間或者攻擊到敵人而增加。至於點樣分配及如何使用唔同屬性嘅卡片，就視乎玩家自己的風格。而且喺「決鬥模式」嘅關卡當中，更設有特殊機關，可把握地形及關卡上的特點重創對手。

雙打靠睇GamePad畫面

話晒今集搬上Wii U推出，當然可以配合到Wii U GamePad嘅獨特操控方法。始終遊戲類型所限，要一邊「無雙式」亂劈再要體感出絕招真係幾煩，所以玩單人模式時，GamePad 嘅畫面都係用嚟顯示地圖同埋開啟道具列切換武器和道具，功能唔算特別。不過換轉雙打時就唔同，以前玩雙打會上下分割畫面顯示，但係Wii U版就可以一個玩家睇住電視屏幕，另一個玩家睇住GamePad上的6.2吋畫面去玩，當然視覺效果無睇電視咁理想，但勝在各有各打，唔使爭。