藝術鞋

近年女裝鞋設計愈來愈誇張兼天馬行空，似藝術品多過似對鞋，早排去完Dolce & Gabbana的SS13 Press Day，就見到有好幾對藝術鞋作。來季品牌兩位設計師繼續以其最愛的Sicily風情做主題，有好多色彩斑斕民族味重的服飾，服裝精彩不在話下，估唔到連品牌一向唔太起眼的鞋履都非常出色。其中幾對紅色鬆糕鞋大玩人手繪畫圖案，或者係雕花甚至係藤織，教人目不暇給，簡直係去到Haute Couture級數如藝術品一樣。不過對鞋成6、7吋咁高，實用性成疑。但品牌人士話有同事試着過都「行到路」喎！雖然本人向來是「平底族」，不過見到呢批靚鞋即時雙眼發光，皆因用來作影相Styling確係一流！

Sanna Senior Reporter

配飾大過天

和潮流男K傾開，佢話好羨慕啲女士嘅服裝選擇夠晒多，淨係去「飲」，閃片又得，Suit裙或Suit褲又得，男仔呢？企理啲，只得西裝一度。我同佢講，雖然選擇係多，不過重點係要識揀啱自己嘅Style，畀你有100款揀，有99款自己都Carry唔到，咪搵嚟搞，有時唔需要一身大紅大綠，只係加上少少配飾都已經好有型。我見K都頗具書卷氣，所以就推介佢去銅鑼灣睇睇英國品牌Hackett London，事關佢哋出嘅Product都幾四正但唔老氣，好似啲袖口鈕，設計簡單但精緻，價錢1,000蚊有找，呢啲細微細眼位先見到個人品味有幾高。其實我自己就心儀一頂有羽毛裝飾紳士帽，好可惜只得男裝，今次輪到我得個恨字啦！

Amy Editor

髮尾飄香

不經不覺已踏入12月，可惜天公不作　美，日日都「天雨濛濛」，又濕又悶，真係想唔日日洗頭都唔得。小記這半年來漂了兩次頭，染了三次頭髮，真係傷到變成一堆草，最近收到IPSA的玫瑰護髮組合，估唔到出開護膚品的IPSA在聖誕選擇推出護髮套裝，小記試用了一星期，感覺非常良好，內含大馬士革玫瑰，味道清幽，特別係用完後真係令到我把「草」變回亮澤秀髮，陣香味仲Keep到一日添！

Yilam Reporter

粉紅救兵

平日小記最愛聽街頭Hip-pop，近日被邀出席MCM慈善晚宴時便親身體驗了Live Show的魅力！雖然當日活動的流程頗為沉悶，幸好有駐場的型格女DJ打碟才令氣氛熱鬧起來，今次晚宴主題係為宣傳MCM聯同香港遺傳性乳癌家族資料庫推出「粉紅袋慈善購物月」計劃，而當晚小記更有幸與出席活動的劉嘉玲、Mandy Lieu等人見面聊天，等得幾辛苦都值得呀！今次慈善活動會去到12月31日，想買聖誕禮物又想幫助別人的話，不妨到店內看看。

Alex Reporter