追尋麻甩之浪漫

早排請假去咗台灣小休數天，特地在台北尋訪唱片店。提起台灣唱片店，大家唔多唔少都熟悉兩間大型唱片店—「佳佳唱片」和「五大唱片」，那兒最適合尋找日本歌手CD及各式內地、台灣和韓國劇集，售價普遍都很相宜。由於筆者早前因追睇電視播嘅《水滸》及《三國》而「毒發身亡」，因而趁此到訪唱片店買劇「完夢」。比起在港發售的《水滸》及《三國》，台版包裝較精美，尺寸統一，收藏較易，所以大出血使了6,500新台幣買晒兩套。好在同行女友都好支持兼冇詐型，仲話：「呢個係麻甩之浪漫嘛！」

Alfred Reporter

$30變5,000億富豪

唔好以為呢疊係大富翁用嘅道具銀紙，其實面頭呢張一個「5」字後跟11個「0」的5,000億鈔票，確實曾經係真錢，不過依家唔再流通喇！呢張係1993年南斯拉夫的5,000億第納爾鈔票，當年因為超級通貨膨脹，先會出到咁大面值，但都只係夠買半個麵包！早前去前南斯拉夫首都貝爾格萊德旅行，見到通往古城堡路上，有位老婆婆開檔兜售5,000億鈔票，筆者忍唔住要買番張扮吓億萬富豪，單張只係賣3歐元，如連埋較細面額，成套1993年南斯拉夫鈔票都係賣5歐元。諗番10月時內地有單新聞，話廣州有位男子發現遺產中有張500億南斯拉夫鈔票（仲要唔係5,000億），於是日日都好驚畀人偷，兼且又驚有咁多錢唔知可以點用時，真係好想笑囉！

注意！5,000億鈔票保持最多個「0」字嘅紀錄，原來喺2008年時，被津巴布韋嘅100兆鈔票取代咗！100兆即是一個「1」字後面跟14個「0」呢！

Brian Reporter

減價唔講樣

小記平時出街着嘅鞋，一定唔會揀關刀牌；不過一講到打籃球就真係無計，因為個Air真係好舒服。有日小記想買對籃球鞋，去到鞋舖發現呢隻款斷碼，但咁啱係本人尺碼，抱住唔可以執輸嘅心情，當然即時磅水買咗佢返屋企，買完之後就日夜不斷催眠自己：「打波啫！唔使買咁靚款嘅！打波啫！唔使買咁靚款嘅……」

Michael Reporter

未來戰士變靚啲

買了藍光版《未來戰士》，卻想起《龍珠》的道拉格斯。同樣是來自未來世界，但觀點卻南轅北轍，前者回到過去欲改變未來；但道拉格斯卻清楚表示，就算返回以前消滅了人造人，存在於未來的邪惡人造人卻不會消失，只是因為時間旅行，而製造了一兩個不同命運的平衡世界而已。至於套藍光版《未來戰士》，畫質確是不俗，經數碼修復後，不少本來「起渣」的暗位都變得深黑厚實得多，唯一遺憾是無論數碼修復技術有幾先進，都無法將女主角個樣執番靚啲，八十年代的審美眼光真令人摸不着頭腦！

Angus Reporter

為對腳買跑鞋

小編將參加明年二月的馬拉松，為了不要太難看地跑畢42.195公里，因此近幾個月不斷跑，儲哩數也。每周盡量擠出三、四個清晨跑5至10公里，再隔星期練長課，至少一口氣跑20公里，平均一個月跑130公里。如此跑法，一定要慎選跑鞋，否則未到比賽日，雙腳已打柴。最近買了Asics的Feather Fine 2，它輕身舒適保護足，訓練、比賽兩皆宜；並且至啱身重兼跑姿屬過度內旋（Over Pronation）的人士，亦即是小弟。其實，我家中鞋櫃裏，尚有這雙藍鞋子的爸爸—Feather Fine和爺爺—Gel Feather，Feather系列三代同堂！當然，阿爸和阿爺已給我跑得老弱傷殘了。

Tony Editor